Araz Əlizadə: İsa Qəmbər Müsavata öz "marionetkasını" başqan təyin etdi

Razi Nurullayev AXCP-dən ayrılandan sonra partiyanı Əli Kərimlinin əlindən alacağını deyib

Bir müddət öncə isə Rauf Arifoğlu Müsavat partiyasından istefa verdi.

AXCP-nin sədr müavini Razi Nurullayev isə siyasi partiyadan əlavə media qurumu da yaradıb mübarizə aparacağını bəyan etdi.

Müsavat partiyası isə bu gün yeni saytının yarandığını açıqladı. Bu isə Müsavat partiyası ilə Rauf Arifoğlunun arasındakı bütün bağların qırılması kimi xarakterizə olunur.

Azərbaycan Sosial Demokrat Partiyasının sədri Araz Əlizadə müxalifət düşərgəsində gedən anlaşılmaz durumu Ölkə.Az-a verdiyi açıqlamasında şərh edib.

Araz Əlizadə: "Gör Əli Kərimli partiyanı nə hala salıb ki, öz müavini AXCP-ni onun əlindən almaq istəyir. Vaxtilə AXCP-nin sədr müavini Zərdüşt Əlizadə, Sabit Bağırov kimi yüksək səviyyli insanlar olub. İndi artıq səviyyə aşağı düşüb. Razi Nurullayev gedib özünə partiya yaradıb. Azərbaycanda nə çox partiya, bu da olacaq onlardan biri.

Rauf Arifoğlu Müsavat partiyasından getdi. Bu da məlum məsələdir. Çünki Rauf Arifoğlu Müsavat partiyasının sədri olmaq istəyirdi. Lakin İsa Qəmbər nə Rauf Arifoğluna, nə də Qubad İbadoluna imkan vermdi ki, onlardan biri başqan olsun. İsa Qəmbər Müsavata öz "marionetkasını" başqan qoydu. Bunlar daha çox gündəmdə qalmaq istəyirlər. Çalışdıqları odur ki, xaricdən maliyyələri kəsilməsin".

Səxavət Məmməd
Ölkə.Az