118 metrlik tunel qazaraq həbsxanadan qaçan şəxslərdən

27 il əvvəl 118 metrlik tunel qazaraq həbsxanadan qaçan şəxslər "Ginnesin Rekordlar Kitabı"ndan narazıdırlar

Həbsxanalarda məhbusların qaçmasının qarşısı müxtəlif üsullarla alınsa da bəzi təcrübəli məhbuslar qaçmağı bacarırlar. Bu məhbuslardan biri də yaxın günlərdə həbsxanadan qaçan “El Chapo” ləqəbli Joaquin Guzmandır. O, 1.5 kilometrlik tunel qazaraq "Antplano" həbsxanasından qaçmağı bacarıb. “El Chapo” qazdığı tunel ilə "Ginnesin Rekordlar Kitabı"na düşüb. Lakin 27 il əvvəl Türkiyədə "Kırşehir" həbsxanasından qaçan 18 məhbus, adlarının "Ginnesin Rekordlar Kitabı"na salınmasını tələb ediblər. Məhbuslar 27 il əvvəl rekord qırdıqlarını deyirlər.

5.5 ay və 118 metr

1988-ci ilin 17 sentyabr tarixində Türkiyənin "Kırşehir" həbsxanasından 18 məhbus qaçdı. Məhbuslardan 6 nəfəri, 1 gün sonra həbs edildi və həbsxanaya geri qaytarıldı. Digərləri isə azadlığa çıxaraq həyatlarını sevdikləri ilə davam etdirdilər. 1988-ci il 17 sentyabr günü baş verən hadisə gündəmə bomba kimi düşmüşdü. Məlum olmuşdu ki, 18 nəfər 5.5 ay boyunca tunel qazıblar. Onlar həbsxanadan qaçarkən hətta şəkil də çəkdiriblər. Görüntüdəki məhbuslardan biri olan Adəm Kütük adlı şəxs, 3 il öncə dünyasını dəyişib. Digər şəxs Selman Altınöz isə Hatayda sadə həyat sürür. 3-cü şəxs olan Veyis Sami Türkmən isə planı quran əsas şəxslərdən biri olub. Türkmən "Ginnesin Rekordlar Kitabı"ndan narazılığını dilə gətirib.

Qəzetlərdən birinə açıqlama verən 59 yaşlı Türkmən, deyir ki, 1988-ci ilə qədər dünyanın ən uzun tunelini onlar qazıb. Türkmən 27 il əvvəl yaşananları danışıb: "Qaçmaq üçün ilk plan, tunelin çöldən qazılması idi. Bunun üçün həbsxanaya yaxın bir yerdə torpaq aldıq. Amma bu planı rəhbərlik başa düşdü. Bu variantdan əl çəkdik. 2-ci planı işə salmağa başladıq. 2-ci plana əsasən 18 nəfər, xəritə vasitəsiylə hansı istiqamətdə tunel qazacaqlarını öyrənməli idilər. Tuneli tualetdən qazmağa başladıq. Tez-tez yoxlama var idi. Bu yoxlamalara qarşı biz də hazırlıq görmüşdük. Bəzən 10 bəzən də 15 gün fasilə vermək məcburiyyətində qalırdıq. Tuneldən çıxarılan torpağı tualetə tökərək yox edirdik. Tunel qazmaq artıq bizim üçün bir əyləncəyə çevrilmişdi. Hətta öz aramızda yarışma da keçirmişdik. Həmin yarışmada məhbuslardan üçünə, 2 metrdən çox məsafə qazdıqları üçün “Qızıl köstəbək mükafatı” vermişdik."

Necə qaçdıqlarını gülə-gülə danışan Türkmən bildirib ki, onlar hətta həbsxanaya fotoaparat belə keçirməyi bacarmışdılar. Fotoaparatı gətirməkdə məqsəd, tunel vasitəsiylə qaçarkən xatirə şəkilləri çəkmək olub: "12 sentyabr günü qaçmalı idik. Lakin 5 gün gecikdik. 17 sentyabrda biz bunu bacardıq. Hamımızda azadlıq sevgisi var idi. Planın ortaya çıxacağı ilə bağlı bir qorxumuz yox idi. İtirəcək bir şeyimiz yox idi. Ən böyük qorxumuz yağış idi. Güclü yağış yağsaydı tunel çökə bilərdi. 5.5 ay qazdıqdan sonra işıq gördük. Adəm işıq gələn yeri bağladı və biz geri döndük. 1 gün sonra artıq çıxacağımızdan əmin idik. 17 sentyabr tarixində arzumuza çatdıq. Hamımız tuneldən çıxdıq. Qruplar halında fərqli yerlərə getdik. Mən və yanımda olan 3 dostum, Suriyaya getməli idik. Amma 1 gün sonra Mersinə getdik. Mersində bizi polis tutdu. İfadələrimiz alındıqdan sonra bizi Malatya həbsxanasına göndərdilər"

Həbsxanadan qaçarkən tutulan Türkmən, 2-ci dəfə tunel qazmağı planlayıb. Amma bu dəfə tuneldən yox, həbsxananın qapısından çıxaraq azadlığa qovuşub: "Həbsxanaya qayıtdıqdan sonra 1 ay "kars"da qaldıq. Malatya həbsxanasında olduğumuz 2.5 il ərzində yenə tunel qazdıq. Bizi dəhşətə düşürən isə əziyyətimizin boşa çıxması idi. Uzun müddət tunel qazdıq. Tunelin bitməsinə 2 metr qalmış məlum oldu ki, bizi əfv ediblər. Biz planın ortaya çıxmamsı üçün tuneli bağladıq və 2 gün sonra azadlığa çıxdıq." (bizimyol.info)

Ölkə.Az