MN: Düşmənin 18 hərbçisi məhv edildi

Bəzi yerli elektron KİV-lər Silahlı Qüvvələrimizin itkilər verməsi barədə mənbəyi bəlli olmayan, qeyri-dəqiq, şayiə səviyyəsində olan məlumatlar yayırlar.

Bu barədə Ölkə.Az-a Azərbaycanın Müdafiə Nazirliyindən bildiriblər.

Nazirlikdən qeyd ediblər ki, Ermənistanın maraqlarına xidmət edən bu kimi xəbərlər Silahlı Qüvvələrimizin təmas xəttində qarşıdurma zamanı erməni hərbi bölmələrinə ciddi itkilər verdiyi zamanda ortaya atılmaqla, hərbi uğurlarımıza kölgə salmaq məqsədi daşıyır.

“Məlumatımıza görə, yalnız avqust ayı ərzində düşmən 18 ölü, 50-dək yaralı olaraq hərbi qulluçusunu itirib.

Rəsmi təsdiqlənməmiş, şişirdilmiş, çox zaman səhv olan, real vəziyyəti düzgün əks etdirməyən xəbərləri tirajlamaqla, erməni dəyirmanına su tökməyə can atan bəzi insanların milli mənşəyi də artıq şübhə doğurmağa başlayır.

Müdafiə Nazirliyi cəbhəboyu zonada baş verən hadisələrlə bağlı, təhlükəsizlik baxımından ictimailəşdirilməsi məqsədəuyğun olan istənilən xəbərləri mütəmadi açıqlayır. Eyni zamanda bu tip xəbərlərin yayımlanmasına həssaslıqla yanaşılmasını növbəti dəfə tövsiyə edir”, - deyə, nazirlikdən vurğulayıblar.

Ölkə.Az