\"ABŞ Ərdoğanı bu bəhanədən məhrum etməlidir\"

"Ancaq qatillər PKK-dan olsa da, Ərdoğan genişmiqyaslı müharibə başlatmaqdan savayı da reaksiya vermək üçün yollar tapa bilərdi"

Siyasi xadimlər bəlaya düşərək müxtəlif taktiki manevrlərdən istifadə edirlər. Misal üçün, Hollivud filmlərindən birində kinoprodüser prezidentin iştirakı ilə olan seks qalmaqalından diqqəti yayındırmaq məqsədilə Albaniya ilə saxta müharibə yaradır. Şübhələr var ki, Türkiyə prezidenti oxşar təhlükəli ssenarini Türkiyədə həyata keçirir.

Ölkə.Az xəbər verir ki, bu barədə nüfuzlu "New York Times" qəzetində çap olunmuş məqalədə deyilir.

Müəlliflərin fikrincə, "Ədalət və İnkişaf Partiyasının" iyunda seçkilərdə çoxluğu itirməsindən sonra Ərdoğan çıxılmaz mübarizəyə başlayıb.

"Ötən ay yeni seçkilər ərəfəsində noyabrın 1-də Ərdoğan hökumətə dəstəyi qazanmaq və bununla geniş səlahiyyətləri, avtoritar idarəçilik ambisiyalarını xilas etmək üçün kürd separatçıları ilə müharibəni bərpa edib", - deyə məqalədə qeyd olunub.

Hərbi əməliyyatların bərpası üçün bəhanə isə iki əsgərin qətlə yetirilməsi olub.

"Ancaq qatillər PKK-dan olsa da, Ərdoğan genişmiqyaslı müharibə başlatmaqdan savayı da reaksiya vermək üçün yollar tapa bilərdi. Müharibəyə başlamaqla Ərdoğan türk millətçilərinə jest edib. Suriyada hərbi nümayəndələrinin İŞİD-ə qarşı mübarizədə ABŞ-ın ən yaxın və effektiv müttəfiqlərinə çevrilmiş separatçıların artan gücü onu narahat edir. Ərdoğan qorxur ki, İran, İraq, Suriya və Türkiyədə yaşayan kürdlər çoxdan arzuladıqları müstəqil dövlətin yaradılması ilə məşğul olacaqlar".

Müəlliflər xatırladır ki, bir müddət öncə Ərdoğan İŞİD-lə mübarizə üçün İncirlik hərbi bazasını təqdim etməyə və koalisiyaya qoşulmağa razılıq verib, ancaq onun üçün əsas prioritet kürdlərlə mübarizədir.

"ABŞ hərbi əməliyyatları dayandırmaq və Ərdoğanı İŞİD-lə müharibəni daha da mürəkkəb edən bu əməliyyatları davam etdirmək üçün əsas götürdüyü bəhanədən məhrum etməlidir", - deyə nüfuzlu qəzetdə yazılıb.

Rəşid Mustafazadə

Ölkə.Az