Türkiyə "Türk axını" layihəsindən imtina edəcəkmi?

"Türkiyə enerji sektorunda olan layihələr, o cümlədən "Türk axını" layihəsindən imtina etməyəcək".

Ölkə.Az xəbər verir ki, bu barədə Türkiyə xarici işlər nazirinin iqtisadi məsələlər üzrə müavini Ayşə Sinirlioğlu danışıb.

"Biz enerji sektoru layihələrindən imtina etməyəcəyik, biz onlara açığıq və bərpa olunan enerji mənbələri ilə bağlı olan layihələri davam etdirəcəyik. Türkiyəyə enerji lazımdır və biz çox istərdik ki, bu və digər oxşar layihələr reallaşdırılsın", - deyə Sinirlioğlu "Türk axını" qaz kəməri layihəsinin perspektivlərini şərh edərkən deyib.

Onun sözlərinə görə, enerji sahəsinə edilən investisiyalar energetika nazirlərinin G20 çərçivəsindəki danışıqlarının ən mühüm aspektlərindən biri olacaq.

"Biz hazırda paradoksu müşahidə edirik: enerji daşıyıcılarının qiymətləri düşür, investorların bir hissəsi bazarı tərk edir, ancaq enerji sahəsinə edilən investisiyalara ehtiyacaq hələ də aktualdır. Eyni zamanda Türkiyənin iştirakı ilə olan enerji layihələrinin bir qismi Avropa istehlakçılarına hesablanıb. Beynəlxalq Enerji Agentliyinin məlumatına əsasən, qlobal iqtisadiyyatın enerji ehtiyacları artacaq", - deyə müavin bildirib.

Qeyd edək ki, “Türk axını” kəməri Rusiyanın Anapa şəhərindən Qara dənizin dibi ilə Türkiyəyə, oradan isə Yunanıstan sərhədinə qədər uzanmalıdır. Yunanıstan sərhədində Avropa ölkələrinə qaz ixracı üçün qazpaylayıcı şəbəkə (xab) yaradılması nəzərdə tutulub. Lakin Avropa İttifaqı Ukraynadan yan keçəcək bu kəmərin tikintisində maraqlı olmadığını və Rusiya qazını əvvəlki marşrut və razılaşmalar çərçivəsində almaq istədiyini bildirib.

Rəşid Mustafazadə

Ölkə.Az