Beynəlxalq Miqrasiya Təşkilatı Avropaya miqrantlarla bağlı çağırış etdi

"Avropa ölkələrinin hökumətlərini miqrantlara qarşı sərt siyasət yürütməməyə çağırırıq".

Bunu Azərbaycanda iki günlük rəsmi səfərdə olan Beynəlxalq Miqrasiya Təşkilatının (BMqT) baş direktoru Uilyam Sinq bu gün keçirdiyi mətbuat konfransında deyib.

BMqT-nin baş direktoru Aralıq dənizinin miqrantların Avropaya axını nəticəsində ölüm dənizinə çevrilməsinə və Avropanın buna laqeyd qalmasına da münasibət bildirib: "Afrikadan gələn ilk qayıq İtaliya sahillərində batdıqdan sonra bu məsələ mənim daim diqqətimdə olub. Avropa İttifaqına üzv olan 28 ölkə ilə yüksək səviyyədə əlaqələrimiz var, bu məsələləri onlarla daim müzakirə edirik, təklif və xahişlərimizi onların nəzərinə çatdırırıq. O zaman Laperuza boğazı yaxınlığında baş verən hadisə nəticəsində 364 nəfər həyatını itirdi. Bundan sonra biz xüsusi sənəd hazırladıq. Həmin sənəd "Ölüm cığırı" adlanırdı. Həmin araşdırmada qeyd etdik ki, indiyədək 40 mindən çox insan qlobal səviyyədə miqrant kimi bir ölkədən digərinə keçərkən ölüb. Onlardan təkcə 22 mini Aralıq dənizində həyatını itirib. Bu gün səhər əldə etdiyim hesabata görə isə 365 165 nəfər Aralıq dənizi, Balkan yarımadası və digər istiqamətlərdə Avropa sərhədlərini keçməyə cəhd edib, onlardan 2664 nəfəri ölüb".

U.Sinq qeyd edib ki, ona görə də BMqT Avropa ölkələrinin hökumətlərinə müraciət edir ki, miqrantlara qarşı sərt siyasət yürütməsinlər, ksenofobiya hallarına son qoyulsun: "Çünki məhz bu cür hallar vəziyyətin daha da pisləşməsinə səbəb olur".trend

Ölkə.Az