Rusiyanın MSK sədri Bakıya gəlmək istəyir

"Argentinaya da getməyi planlaşdırıram”

Ölkə.Az xəbər verir ki, Rusiyanın Mərkəzi Seçki Komissiyası Yunanıstan və Türkiyədə keçiriləcək növbədənkənar seçkiləri müşahidə edəcək.

Bu barədə bu gün jurnalistlərə Komissiyanın rəhbəri Vladimir Çurov məlumat verib. Çurov həm də Belarusda prezident seçkilərinə müşahidəçi qismində qatılacağını da planlaşdırır. O, Azərbaycan və Argentinada keçiriləcək seçkiləri də müşahidə edəcəyini istisna etmir.

“Mən Belarusa getməyi düşünürəm, əgər həkimlər icazə versələr, Argentinaya da getməyi planlaşdırıram”, - deyə Çurov bildirib.

O, Azərbaycana parlament seçkilərinə də gələ biləcəyini dilə gətirib.

Qeyd edək ki, Yunanıstanda parlament seçkiləri sentyabrın 20-də, Türkiyədə isə noyabrın 1-də keçiriləcək.

Xatırladaq ki, dünən Rusiya Federasiyasının Sənaye və ticarət naziri Denis Manturov yaxın zamanda Azərbaycana səfər edəcəyi barədə məlumatlar yayılmışdı. Bu barədə Azərbaycan Respublikası prezidenti İlham Əliyevlə görüşdə RF-in xarici işlər naziri Sergey Lavrov məlumat vermişdi.

Rəşid Mustafazadə

Ölkə.Az