Bank hesabına həbs qoyulan QHT-lərdən
Baş Prokurorluğun təqdimatına əsasən, rayon məhkəmələrinin qərarı ilə bir sıra qeyri-hökumət təşkilatının (QHT) bank hesabına həbs qoyulmasından sonra həmin qurumlar hansı addımı atacaqlar?
Ölkə.Az xəbər verir ki, bu sualla modern.az təşkilat rəhbərlərinin fikirlərini öyrənib:
“Demokratiya və İnsan Hüquqları Resurs Mərkəzi”nin rəhbəri Əsabəli Mustafayev: “Bank hesabına qadağa qoyulmuş QHT-lə bərabər apellyasiya şikayətləri verilsə də, məhkəmə bunu təmin etmədi. Ölkə daxilində bütün instansiyalardan keçmişik. Amma bir nəticə verməyib. Artıq bank hesablarına qadağa qoyulmuş bütün qeyri-hökumət təşkilatlarının rəhbərlərilə birlikdə Avropa Məhkəməsinə müraciət etməyi düşünürük. Hazırda sənədlərin hazırlanması ilə məşğuluq”.
“Azad İqtisadiyyata Yardım İctimai Birliyi”nin sədri Zöhrab İsmayıl: “Təşkilatımızın fəaliyyəti artıq dayanıb. Apellyasiya şikayəti təmin olunmadı. Sadəcə gözləyirik. Yəqin ki, biz də Avropa Məhkəməsinə müraciət edəcəyik. Bizim təşkilata qoyulan həbsi “Oksfam”la əlaqələndiriblər. Maraqlıdır ki, onların hesablarına həbs qoyulmayıb, amma bizim hesablara qoyulub. Həm də “Oksafam”la olan layihəmiz artıq iyun ayında başa çatıb. Həmçinin həbs qoyulan layihələrin ikisi də Ədliyyə Nazirliyində qeydiyyatdan keçib, bildirişimiz də var. Məhkəmədə həmin bildirişləri təqdim etməyimizə baxmayaraq, bir nəticəsi olmadı. Hesablarımız bağlı olduğundan işçilərə maaş verə bilmədik, icarə haqqını da ödəməmişik. Yəqin ki, 1 ay da belə davam etsə, tamamilə fəaliyyətimiz dayanacaq”.
“Neftçilərin Hüquqlarının Müdafiəsi Təşkilatı”nın sədri Mirvari Qəhrəmanlı: “Apellyasiya Məhkəməsinə şikayət versək də, məhkəmə vaxtı prokurorluqdan heç kəs depozitin, yaxud da təşkilatın bank hesabının həbsinin səbəbini əsaslandıra bilmədi. Onlar elə bir layihəyə həbs qoydular ki... Halbuki, Azərbaycan hökuməti şəffaflığın tərəfində olduğunu göstərməli idi. Hazırda təşkilatların şikayəti təmin edilmədiyindən birlikdə xüsusi prioritetlərlə Avropa Məhkəməsinə müraciət etməyə hazılaşırıq”.
Mirvari Qəhrəmanlı bildirib ki, bank hesabına həbs qoyulan təşkilatların dəqiq sayı açıqlanmır, çünki adları açıqlanan kimi onlara basqı daha çox olur.
“Bu səbədən çoxları həbs qoyulmasını gizli saxlamağa çalışır. Hansı əsaslarla mənim şəxsi hesabımı demirəm, 2000-ci illərdə qoyulmuş depozit hesabıma həbs tətbiq edildiyinin səbəbi aydın deyil və heç kim də bunu əsaslandıra bilmir. Biz hər zaman başqalarının hüquqlarını qoruyan təşkilatlar olaraq, öz hüquqlarımızı da qoruyacağıq və təşkilatımızın təqsirsiz olduğunu sübut edəcəyik”.
Qeyd edək ki, 20-yə yaxın qeyri-hökumət təşkilatının bank hesabına həbs qoyulub. Baş Prokurorluğun məhkəmələrə təqdimatının məzmununa görə, cinayət işi Azərbaycanın bir sıra QHT-lərin və xarici QHT-lərin filial və nümayəndəliklərinin fəaliyyətində aşkar edilmiş qanun pozuntuları faktları üzrə Cinayət Məcəlləsinin 308.1 və 313-cü maddələri ilə istintaq olunur. Cinayət işi üzrə ABŞ-ın Marşal Fondu, Beynəlxalq Tədqiqatlar və Mübadilə Şurası Humanitar Təşkilatı (İREX), Açıq Cəmiyyət İnstitutu Yardım Fondunun Azərbaycandakı nümayəndəliyi və ABŞ-ın Azərbaycandakı səfirliyi tərəfindən bu QHT-lərin bank hesablarına külli miqdarda vəsaitin köçürülməsi ilə əlaqədar həmin pul vəsaitinin cinayətin predmeti olmaqla, alət və vasitə kimi istifadə edilməsinə dair sübutlar mövcud olduğundan ibtidai istintaqın tam, hərtərəfli və obyektiv aparılmasının təmin edilməsi, gələcəkdə cinayət yolu ilə əldə edilmiş pul vəsaitlərinin xüsusi müsadirəsinin təmin edilməsi, həmçinin özgəninkiləşdirilməsinin qarşısının alınması məqsədi ilə həmin QHT-lərin bank hesablarının üzərinə cinayət təqibinin davam etdiyi müddətdə ərzində həbs qoyulmaqla onlar üzrə əməliyyatlar aparılmasına xitam verilib. Rayon məhkəmələri də bu QHT-lərin bank hesabları üzərinə cinayət təqibinin davam etdiyi müddət ərzində həbs qoyulması barədə qərar verib./modern.az/
Ölkə.Az
