Rəbiyyət Aslanova kürsüsünü itirir

Ölkə.Az Milli Məclisin deputatları ilə bağlı silsilə yazılarını davam etdirir. Bu dəfə 109 saylı Balakən seçki dairəsinin deputatı Rəbiyyət Aslanovanı son beş ildəki fəaliyyətini dəyərləndirməyə çalışacağıq. Təbii ki, bu dəyərləndirmə həm də Balakəndən olan seçicilərin saytımıza dedikləri əsasında aparılacaq.

Rəbiyyət Aslanovanın noyabrın 1-də baş tutacaq parlament seçkisində səs alacağı elə də inandırıcı görünmür. Birincisi, Aslanova 2005-2010-cu illərdəki deputatlığından fərqli olaraq, bu dəfə seçicilərin problemləri ilə elə də maraqlanmayıb. Digər tərəfdən oğlu Elnur Aslanovun adının "nurçuluq"da hallanması da xanım deputatın şanslarını xeyli dərəcədə aşağı salıb.

Balakən seçicilərini isə onunla bağlı ən narazı salan məqam əlçatan olmamasıdır. Belə ki, bəzən seçicilərin nəinki onun özü, hətta köməkçisi ilə da əlaqə saxlamaqda çətinlik çəkirlər. Elə Rəbiyyət Aslanovanın özü də seçicilərin ondan incik olduğundan xəbərdardır. Hətta mümkündür ki, məhz bu amilə görə namizədliyini irəli sürməsin. Seçicilərin dediklərindən:

"Balakən üç tərəfdən qonşu dövlətlərlə həmsərhəd rayondur, paytaxtdan 500 kilometr uzaqlıqda yerləşir, gənclərin işsizlik problemi var. Düzdür, işsizlik probleminin Rəbiyyət Aslanovaya birbaşa aidiyyatı olmasa da, o, bu problemin həlli üçün deputat kimi demək olar ki, heç bir addım atmayıb".

Aslanova barədə əldə etdiyimiz digər məlumata görə, o, namizədliyini başqa dairədən irəli sürmək istəyir. Ancaq Yeni Azərbaycan Partiyasının bu dəfə onun namizədliyini irəli sürüb-sürməyəcəyi bəlli deyil. Belə olan halda, R.Aslanova təkbaşına seçkiyə getməkdən vaz keçəcək. Hər halda bir neçə gün gözləmək qalır...

Ölkə.Az