İmtahan verənə “sənə çox güvənirəm” demək olmaz – Qəribə xəbərdarlıq

Mövzu ilə bağlı Ölkə.Az-a danışan psixoloq Rövşən Nəcəfov bildirib ki, bu cür motivasiyalar  fayda vermir:

“Hər yaşın öz imtahanı və imtahana uyğun həyəcanı var. Həyəcan davam etdikcə orqanizmdə gərgin reaksiyalar başlayır. Stres insanın hadisələrə açıq və gizli formada gərgin reaksiyasıdır. İnsanın həyatı kədərə və sevincə bağlıdır. Bəzən insanlar hansısa müsbət nəticənin əldə edilməsində motivasiyanın verilməsini düzgün hesab edirlər. Bu, tamamilə yanlışdır. Motivasiya anlayışı elmi istinadı olmayan qeyri-peşəkar yanaşmadır. Motivasiya stresi nə azaldır, nə də ki idarə edir. İnsanı heç bir uğura təhrik etmək olmaz. Uğur əziyyətin doğru zamanda hökmüdür.
“Sənə çox güvənirik, sən hamısını edərsən” ifadəsinin imtahan verəcək şəxsə deyilməsi doğru deyil. Doğru olan şəxsin imtahana psixoloji sağlam hazır olmasıdır”. 

R.Nəcəfov deyib ki, həyəcan stres halına çatıbsa, psixoloqa müraciət etmək lazımdır:

“Əks halda şəxsdə suisidal düşüncələr formalaşacaq. Nəticənin nə olmağından asılı olmayaraq valideynlər övladlarının yanında durmalıdırlar. Heç bir imtahan insanın sağlamlığından artıq deyil. İnsan fiziki və ya psixoloji sağlam olmadığı halda “uğur” anlayışı öz əhəmiyyətini itirmiş olur. Uşaqları həyatın imtahanlarına hazırlamaq lazımdır. İmtahanda dörd səhv bir düzü aparırsa, həyatda bir səhv bütün düzləri aparır”.

Billurə Yunus