Ərdoğan terror aktından danışdı: "Allah səbr versin"

"Millətimizin başı sağ olsun!"

Ölkə.Az xəbər verir ki, Türkiyə prezidenti Rəcəb Tayyıb Ərdoğan ötən gecə Dağlıcada baş vermiş terror aktından danışıb.

O teleefirdə çıxışı zamanı deyib ki, Türkiyə Silahlı Qüvvələri və Baş Qərargah məsələ ilə bağlı araşdırmaları davam etdirir və baş nazir Əhməd Davudoğlu Ankaraya çatdıqdan sonra Milli Təhlükəsizlik Şurasının təcili iclası keçiriləcək.

"Təbii ki, Baş Qərargah rəisinin izahatları çox üzücüdür. Hamımızın başı sağ olsun! Millətimizin başı sağ olsun! Allah səbr versin!", - deyə Ərdoğan əlavə edib.

Ərdoğan ölən və yaralananların sayını açıqlamayıb. O qeyd edib ki, terror hadisəsinin baş verdiyi ərazidə hava şəraiti çox pisdir.

Xatırladaq ki, ötən gecə Türkiyədə baş vermiş terror hadisəsi nəticəsində çoxlu sayda şəhid və yaralının olduğu bildirilir. Hakkarinin Dağlıca bölgəsində PKK terror təşkilatının üzvlərinin yola basdırdıqları mina əsgərləri daşıyan iki zirehli maşın keçərkən partlayıb.

Nəticədə şəhid və yaralıların olduğu bildirilir. Hadisə ilə bağlı Türkiyə Baş Qərargahının yaydığı açıqlamada şəhid və yaralı sayı göstərilməyib.

“Reuters” xəbər agentliyi isə terror nəticəsində 15 əsgərin şəhid olduğunu yazıb.

Məlumata görə, yola basdırılmış minanın partlaması nəticəsində Türkiyə Ordusunun iki maşını tamamilə parçalanıb.

Rəşid Mustafazadə

Ölkə.Az