Moldovada hökumət əleyhinə etirazlar səngimək bilmir - çadırlar quruldu

Çadırların sayı artırılacaq

Ölkə.Az xəbər verir ki, Moldovanın paytaxtı Kişinyovda etirazçılar 90-dan çox çadır qurublar.

İştirakçılar bəyan edir ki, konkret nəticələr əldə olunana qədər çadırların sayı artırılacaq. Bir müddət öncə hüquq-mühafizə orqanlarına qarşı davranışlara görə 8 nəfər həbs olunub.

Dünəndən Moldovanın paytaxtı Kişinyovda kütləvi anti-hökumət mitinqi keçirilir. Böyük Milli Məclis meydanına on minlərlə etirazçı toplaşıb.

Aksiya iştirakçıları hökumətin ölkədəki sosial-iqtisadi vəziyyətə görə məsuliyyət daşıdığını bəyan edir və anti-hökumət şüarları səsləndirirlər. Onların çoxu əllərində Moldova, Rumıniya və Avropa Birliyinin bayraqlarını tutub.

Etirazçılar bank sistemindən pulların oğurlanmasına səbəbkar olanların məsuliyyətə cəlb olunmasını tələb edirlər. Hələlik mitinqin sakit keçdiyi bildirilir. İctimai asayişi onlarla polis əməkdaşı qoruyur.

Moldovanın daxili işlər naziri Oleq Balan bugünkü mitinqlə bağlı brifinqdə bildirib ki, paytaxt sakinlərinin və aksiya iştirakçılarının özlərini təhlükəsizlikdə hiss etmələri üçün əlindən gələni edəcək. O həmçinin aksiya iştirakçılarına müraciət edərək, şübhəli çantaları və ya üzündə maska olan şəxslər barədə polisi məlumatlandırmağı xahiş edib.

Rəşid Mustafazadə

Ölkə.Az