Putin Sarkisyanla bu 3 mövzu barədə danışacaq

Vladimir Putin Ermənistan prezidenti ilə nədən danışacaq?

Ölkə.Az xəbər verir ki, bu gün Ermənistan prezidenti Serj Sarkisyan Moskvaya səfər edəcək. İşgüzar səfər çərçivəsində o, Rusiya Federasiyası prezindenti Vladimir Putinlə görüşəcək.

"Alte Et Certe" analitik mərkəzinin direktoru Andrey Yepifantsevin fikrincə, danışıqların əsas müzakirə mövzusu Lavrovun baş tutmuş Bakı səfəridir.

"Həmin görüş ciddi gizlilik şəraitində keçib və mən ehtimal edirəm ki, görüşlərdəki mövzular oxşardır - bu, Dağlıq Qarabağ münaqişəsinin nizamlanması ilə bağlı yeni təkliflərdir", - deyə politoloq bildirib.

Onun fikrincə, Putin-Sarkisyan görüşünün ikinci mövzusu iki ölkə arasındakı iqtisadi münasibətlərdir.

"Sirr deyil ki, hazırda iqtisadiyyatımızdakı vəziyyət mürəkkəbdir və bundan erməni iqtisadiyyatı da əziyyət çəkir. Bundan əlavə, Ermənistan AİB-in üzvü olub. Bu, dövlətə müəyyən hüquq və imkanlar, kreditlər, əmək bazarlarına çıxış verdiyi qədər, həm də gömrük tarifləri, istehsal standartları və digər iqtisadi sahələrdə müəyyən öhdəliklər verir", - deyə Yepifantsev qeyd edib.

"Alte Et Certe" analitik mərkəzinin direktoru danışıqların üçüncü mövzusu kimi Ermənistanda enerji tariflərinin qalxması məsələsini göstərib.

Kremlin mətbuat xidmətinin məlumatına görə, gündəmdə siyasi, iqtisadi, mədəni-humanitar sahələrdə ikitərəfli münasibətlərin gələcəkdə dərinləşdirilməsi və avrasiya məkanında inteqrasiya məsələləri var.

Xatırladaq ki, Ermənistan prezidenti Serj Sarkisyan mayın 8-də Avrasiya Ali İqtisadi Şurasının iclasında və mayın 9-da "Böyük Vətən Müharibəsi"nin 70 illiyinə həsr olunmuş tədbirlərdə iştirak etmək üçün Moskvada səfərdə olmuşdu.

Rəşid Mustafazadə

Ölkə.Az