Putin Sarkisyanla Qarabağı müzakirə edir
Bu gün Moskvada Vladimir Putin və Serj Sarkisyanın görüşü keçirilir.
Kremlin mətbuat xidməti görüş əsnasında Ermənistanla Rusiya arasında “ikitərəfli siyasi, iqtisadi, mədəni-humanitar sahələrdə əməkdaşlığın və Avrasiya məkanında qarşılıqlı inteqrasiya əlaqələrin daha da dərinləşdirilməsi” məsələlərinin müzakirə olunacağını bildirib.
Ermənistan informasiya vasitələri səfərin Rusiya prezidentinin təklifi ilə baş verdiyini qeyd edir və görüş gündəliyinin əsas məsələsinin Dağlıq Qarabağ problemi olacağını bildirir.
Gündəlikdəki mühüm məsələlərdən biri, bu ay BMT Baş Assambleyasının iclası çərçivəsində Ermənistan və Azərbaycan prezidentləri arasında ehtimal olunan görüş barədə müzakirə hesab olunur.
Güman edilir ki, Rusiya prezidenti Serj Sarkisyana ötən həftə Bakıda keçirilən Rusiya-Azərbaycan danışıqları barəsində məlumat verəcək.
Bakıda Azərbaycan prezidenti İlham Əliyevlə görüşü zamanı Rusiya xarici işlər naziri Sergey Lavrov bəyan etmişdi ki, Moskva Dağlıq Qarabağ münaqişəsinin tənzimlənməsi üzrə irəliləyişə ümid edir.
Ermənistan informasiya vasitələri Lavrovun Bakı səfərindən sonra Dağlıq Qarabağ təmas xəttində və Ermənistan-Azərbaycan sərhədində son bir neçə gün ərzində vəziyyətin gərginləşdiyinə diqqəti çəkir.
“Maraqlıdır ki, məhz Sergey Lavrovun Bakıya səfərindən sonra Azərbaycan tərəfi Ermənistanın Tavuş vilayətini bir neçə gecə ərzində şiddətli atəşə tutmuşdu”, - Aracin Lratvakan informasiya portalının icmalında deyilir.
Bu arada isə Azərbaycan Müdafiə Nazirliyi ötən həftə ərzində erməni silahlı bölmələrinin cəbhənin müxtəlif istiqamətlərində minaatanlar, iriçaplı pulemyotlardan da istifadə etməklə atəşkəsi 834 dəfə pozması barədə məlumat verib.
"Güzəştə təhrik"
ABŞ və NATO-nun Cənubi Qafqaz bölgəsində fəallaşması fonunda Rusiya öz mövqelərini möhkəmlətmək istəyir, Lragir.am internet nəşrin şərhçisi Haykaz Ğahriyan yazır.
“ABŞ Qarabağ üzrə danışıqlarda dominant rola malik olub, NATO isə artıq Gürcüstanda təsbit olub. Belə olan halda Rusiya Azərbaycanla münasibətlərdə güzəştə hazırdır, çünki başqa təsir vasitələri yoxdur”, - Ğahriyan deyir.
Onun fikrincə, “Rusiya müstəqil siyasət yeridən” Azərbaycanı Avrasiya İqtisadi Əməkdaşlıq İttifaqına cəlb etməyə çalışır və Ermənistanı Qarabağ məsələsində güzəştə məcbur edə bilər.
“Təsadüfi deyil ki, beynəlxalq mətbuatda Moskvanın ermənilər tərəfindən nəzarət edilən əraziləri Azərbaycana təhvil verməyə hazır olduğu haqqında məlumatlar peyda olur. Və qeyd olunur ki, Serj Sarkisyanla 7 sentyabr Moskva görüşü zamanı Putin belə təklif irəli sürə bilər”, - icmalda deyilir.
Moskva görüşünü gündəliyinin daha bir vacib məsələsi Ermənistanın Avrasiya İqtisadi Əməkdaşlıq İttifaqına üzv olduqdan sonra Rusiya iqtisadi böhranı səbəbindən bu ölkə ilə mal dövriyyəsinin kəskin şəkildə azalması ola bilər. (qafqazinfo)
Ölkə.Az
