“Gecikmiş kreditlərin həcmi artacaq”

Ölkədə vaxtı keçmiş kreditlərlə bağlı yeni statistika açıqlanıb. 31 iyul 2015-ci il tarixinə banklarda ödəmə vaxtı keçmiş kreditlərin məbləği 1 milyard 294,8 milyon manat təşkil edib.

İyul ayında ödəmə vaxtı keçmiş kreditlər 43,9 milyon manat və ya 3,3 faiz azalıb. Belə ki, iyun ayının sonunda ödəmə vaxtı keçmiş kreditlərin məbləği 1 milyard 338,7 milyon manat idi. Ödəmə vaxtı keçmiş kreditlərin cəmi kredit qoyuluşlarında xüsusi çəkisi 6,6 faizdən 6,4 faizə düşüb. İyul ayında kredit təşkilatlarının cəmi kredit qoyuluşları 101 milyon manat azalaraq İyun ayının sonundakı 20 milyard 288,5 milyon manatdan 20 milyard 187,5 milyon manata düşüb. Eyni dövrdə ev təsərrüfatlarına verilən kreditlər 7 milyard 884,6 milyon manatdan 7 milyard 769,9 milyon manata geriləyib. 

 

Bəzi ekspertlər bildirirlər ki, bununla manatın devalvasiyasının yaratdığı problemli kreditlər problemi başa çata bilər. Yəni problemli kreditlərin yaranmasında əsas çətinliyi ilin əvvəlində elan edilmiş devalvasiya yaradıb. 

 

Ekspert Əkrəm Həsənov isə məsələ ilə bağlı musavat.com-a bildirib ki, vaxtı keçmiş kreditlərin sayı və həcmi arta-arta gedəcək: “Nəticəsi bəllidir: əmanətlər bata, banklar müflis ola bilər”.

 

O, qeyd edib ki, bankların böyük əksəriyyəti maliyyə göstəricilərini gizlədir: “Halbuki qanunvericiliyə görə, rübdə bir dəfə saytlarında açıqlamalıdırlar. Buna görə də konkret olaraq hansı bankların bağlanma təhlükəsi qarşısında olmasını söyləmək çətindir. Normal vəziyyətdə bunu maliyyə göstəriciləri əsasında demək olar. Lakin bizdə vəziyyət fərqlidir. Aşağıdakı banklar maliyyə göstəricilərini gizlədir: AGBank, Amrahbank, AtaBank, Atrabank, Bank Avrasiya, Bank of Azerbaijan, Bank BTB, Bank Respublika, Bank Standard, Caspian Development Bank, DekaBank, Dəmirbank, Gəncəbank, Günaybank, XalqBank, KredoBank, Muğanbank, Naxçıvanbank, Nikoil Bank, Pakistan Milli Bankı Bakı filialı, ParaBank, Rabitəbank, Bank Technique, YapiKrediBank, United Credit Bank, Zaminbank. Deməli, onların hamısının vəziyyəti ağırdır. Hesabatlarını açıqlayan baklardan isə ən ağır vəziyyət Rusiyaya məxsus Bank VTB-Azərbaycan-dadır. Bank 17 milyon manat zərərdədir. Kapital tələbi 50 milyon manat olduğu halda, kapitalı hazırda heç 34 milyon deyil. Rusiyanın ağır vəziyyətini nəzərə alaraq, bu bank hər an bağlana bilər. Amma burada siyasi məqamlar da var. Nə qədər ki, Rusiya iqtisadiyyatı tam çökməyib bu bank nəyi pozursa pozsun, yəqin ki, hələlik bir təhər üzdə qalacaq”.

 

Ə.Həsənov vurğulayıb ki, manat hazırda yalnız valyuta ehtiyatlarının xərclənməsi hesabına sabitdir: “Məlumdur ki, son ayda Mərkəzi Bank 1,2 milyard dollar valyuta ehtiyatı itirib. Yəqin ki, ilin sonunadək bu qədər də itirə bilər. Lakin ehtiyatlar sonsuz deyil. Əvvəl-axır devalvasiya ola bilər, əlbəttə, əgər neftin qiyməti xeyli artmasa. Bunun ehtimalı isə azdır. Həm də bizdə neft hasilatı da düşür. Digər tərəfdən Mərkəzi Bank da heç bir əməli tədbir görmür. Buna görə də düşünürəm ki, yaxın 6 ay ərzində devalvasiya olacaq”. (musavat)