"Sarkisyan Moskvaya həm dilənməyə..."

Ermənistan prezidenti Serj Sarkisyan Rusiyaya səfəri zamanı Putinə Azərbaycandan şikayətlər edib

Sarkisyan son günlər vəziyyətin gərginləşdiyini, Azərbaycan ordusunun iriçaplı silahlarla yanaşı, artilleriyadan da istifadə etdiyini dilə gətirib.

Sarkisyanın Putinə şikayətlərini və Rusiyanın Ermənistana güzəştli kredit verməsini hərbi ekspert Üzeyir Cəfərov Ölkə.Az-a şərh edib.

Üzeyir Cəfərov: "Sarkisyan Rusiyaya səfər etməzdən əvvəl bilinirdi ki, gedib orada daş atıb, başını tutacaq. Azərbaycanı olan və olmayan məsələlərdə günahlandıracaq. Həqiqətən elə də oldu. Sarkisyan Moskvaya həm dilənməyə, həm də Azərbaycanla bağlı narahatçılığını dilə gətirməyə gedib. Azərbaycan təlimlər keçirir və Ermənistan bundan narahatdır.

Azərbaycanın daşı ağır idi. Sarkisyan da bir qədər vəziyyəti ağırlaşdırmağa qərar verib. Təəssüflər olaun ki, Rusiya yenə ikibaşlı oynayır. Rusiya Dağlıq Qarabağ məsələsi il bağlı Ermənistana təzyiq etmək yerinə onlara silah-sursat verir və əlavə olaraq da 200 milyon dollar güzəştli kredit verib. Əminəm ki, 200 milyon rəsmi rəqəmdir, qeyri-rəsmi olaraq Rusiya Ermənistana daha çox şey verib. Azərbaycan bundan çəkinməməlidir. Onsuzda bilirik ki, Rusiya Dağlıq Qarabağ məsələsində heç vaxt səmimi olmayıb.

Sentyabrın 13-nə qədər Azərbaycan ordusunun keçirəcəyi təlim də Ermənistana yaxşı bir mesaj olacaq".

Qeyd edək ki, Sarkisyanın səfəri zamanı Rusiya erməni silahlı qüvvələrinin arsenalını yeniləməsi üçün 200 milyon dollarlıq güzəştli kredit verib.

Səxavət Məmməd
Ölkə.Az