İlham Əsgərovun yasına getməyən həmkarı:

Bu gün mərhum xalq artisti İlham Əsgərovun vəfatından üç gün ötür

Akademik Milli Dram Teatrının aktyorları bildirirlər ki, teatr rəhbərliyi, Həmkarlar Təşkilatı aktyorların yas mərasimində iştirakı üçün heç bir addım atmayıb.

Bu və digər məsələlərlə bağlı Ölkə.Az-ın suallarını teatrın Həmkarlar Təşkilatının sədri, əməkdar artist Elxan Quliyev cavablandırır:

- Elxan müəllim, bu gün mərhum xalq artisti İlham Əsgərovun üç mərasimidir. Yəqin ki, siz də iştirak edəcəksiniz...

- Mən burada deyiləm, Qəbələdə çəkilişdəyəm. Əgər Bakıda olsaydım, böyük məmnuniyyətlə iştirak edərdim. Şəhərdə olsaydım, sözsüz ki, iştirak edəcəkdim, hər şey də təşkil olunacaqdı. Amma mənim orda olub-olmamağımın dəxli yoxdur.

- Aktyorlar bildirirlər ki, teatrdan avtobus ayrılmadı və öz şəxsi avtomobillərimizlə gedirik...

- Ola bilməz ki avtobus təşkil etməsinlər. Teatrın truppa müdiri Elnur Məmmədov təşkil edəcək, avtobusla gedəcəklər.

- Sizdən bir az əvvəl danışdım və avtobus ayrılmadığını dedilər...

- Mən Bakıda olmadığıma görə heç nə deyə bilmərəm.

- Həmkarlar Təşkilatının sədri kimi siz də belə məsələlərdə məsul şəxs hesab olunursunuz axı?!

- Deyirəm ki, şəhərdə deyiləm, başa düşün.

- Müavininiz var?

- Müavinim yoxdur da, yoxdur. (qısa pauzadan sonra) Müavinim Nurəddin Quliyevdir, Mehdixanlı.

- Həmkara qarşı bu dərəcədə hörmətsizlik olarmı?

- Sözsüz ki, şəhərdə olsaydım hər şey təşkil edəcəkdim. Çəkilişi necə ata bilərəm? Müqavilə bağlamışam, hardan biləydim ki, belə hadisə baş verəcək.

- İraq olsun, yaxınlarınızdan biriylə bağlı eyni hadisə yaşansaydı, yenə çəkilişi ata bilməyəcəkdiniz?

- Bəli. bəli. Çünki müqaviləm var.

 

İntiqam VALEHOĞLU
Ölkə.Az