Xamenei: "ABŞ-la başqa mövzularda danışıqlar ola bilməz"

"Başqa sahələr üzrə ABŞ-la danışıqlara yol verməyəcəyik"

Ölkə.Az-ın xəbərinə görə, İran İslam Respublikasının ali dini lideri Ayətullah Əli Xamenei bəyan edib ki, ABŞ-la aparılan istənilən gələcək danışıqlar yalnız beynəlxalq nüvə razılaşması ilə bağlı ola bilər və hər hansı digər sahələrə toxuna bilməz.

Xameneinin saytında yayımlanan bəyanatda deyilir:

"Biz ABŞ-la yalnız nüvə məsələləri ilə üzrə danışıqlara razılıq verdik. Başqa sahələr üzrə ABŞ-la danışıqlara yol verməyəcəyik", - deyə lider bildirib.

Ayətullahın sözlərinə görə, digər mövzulara dair danışıqlar ABŞ-a İrana təsir etmək və öz iradəsini sırımaq imkanı verəcək.

Xatırladaq ki, iyul ayında Vyanada İran ilə altılıq ölkələri arasında aparılan danışıqlarda ötən gün razılaşma əldə olunub. Bu razılaşmaya görə, İran daxilində nüvə obyektlərinin təftişi - BMT inspektorlarına hərbi obyektləri təftiş etməyə icazə verilə bilər, amma bu avtomatik olmaya bilər.

İran razılaşır ki, əgər razılaşmanı pozarsa, sanksiyalar 65 gün ərzində bərpa oluna bilər. bundan başqa, BMT-nin silah embarqosu və raket sanksiyaları 5-8 il ərzində qüvvəsində qalacaq.

İran ilə altılıq ölkələri arasında əldə olunan bu razılaşma dünyada birmənalı qarşılanmayıb. Bir çox ölkə İranla "altılıq" arasında əldə olunan razılığı dəstəkləsə də, digərləri tənqid edir.

Rəşid Mustafazadə

Ölkə.Az