ABŞ daha çox qaçqın qəbul etməyə hazırdır
ABŞ-a 1500 qaçqın daxil olub
Ölkə.Az "Reuters" agentliyinə istinadla xəbər verir ki, Amerika Birləşmiş Ştatları Suriyadan daha çox qaçqın qəbul etməyə hazırdır.
Bunu dünən Vaşinqtonda çıxışı zamanı ABŞ dövlət katibi Con Kerri deyib.
"Biz qaçqınların sayını artırmağı özümüzə borc bilirik", - deyə Kerri bildirib
O, rəqəmlər barədə dəqiq məlumat verməyib.
4 il əvvəl Suriyada vətəndaş müharibəsinin başlamasından ABŞ-a 1500 qaçqın daxil olub.
BMT-nin qaçqınlarla iş üzrə ali komissarı Antoniu Quterreş Avropa İttifaqı ölkələrini İraq, Suriya və Əfqanistandan gələn 200 min miqrantı qəbul etməyə çağırıb.
Onun sözlərinə görə, Aİ ölkələri Avropaya qanuni olaraq daxil olan qaçqınlara geniş imkanlar verməlidir. O, miqrant böhranının həlli ilə bağlı vahid strategiya hazırlamağa, Yunanıstan, Macarıstan və İtaliyanı isə qaçqınların qəbulu ilə məşğul olan mərkəzləri quraşdırmağa çağırıb.
Son dövrlər miqrant problemi dərinləşməkdədir.
Almaniya bu il ölkəyə 800 min qaçqının gəlişini gözləyir. Bu barədə Almaniya əmək və sosial siyasət naziri Andrea Nales bəyan edib. O qeyd edib ki, miqrantların əmək bazarına daxil olması asanlaşdırılacaq.
Xatırladaq ki, bir müddət öncə Avstriyada 70-ə yaxın qeyri-qanuni miqrantların meyiti olan yük maşını aşkar edilmişdi. Avtomobillə mühacirlər ölkəyə gətirilirib və onlarla mühacir avtomobilin qoşqusunda boğularaq ölmüşdülər. Onlar Avstriya ilə Macarıstanı birləşdirən avtomobil yolunda tapılıblar.
Qeyd edək ki, 2015-ci ilin əvvəlindən Avropa İttifaqı ərazisinə 340 min miqrant daxil olub.
Rəşid Mustafazadə
Ölkə.Az
