İŞİD bu şəxsləri satışa çıxardı

Nazir terrorçuların istəklərini yerinə yetirməkdən imtina edir

Ölkə.Az "Associated Press" informasiya agentliyinə istinadən xəbər verir ki, İŞİD terror təşkilatı iki əcnəbi vətəndaşı girov götürdüyünü bəyan edib.

Terrorçular biri Norveç, digəri isə Çin vətəndaşı olan kişilərin sarı geyimdə olan fotolarını yayımlayıb. Qeyd olunur ki, Norveç vətəndaşının adı Ole Yohan Qrimsqaard-Ofstaddır, onun 48 yaşı var və o, Oslo sakinidir. İkinci girov olan Fan Tszinhuey isə Çinin paytaxtındandır və bu şəxsin 50 yaşı var.

İŞİD-çilər bildirib ki, girovları yalnız pul müqabilində buraxa bilərlər. Fotolarda isə müvafiq olaraq "Norveçli girov" və "Çinli girov" yazıları görünür. Onların hər birinin altında "satılır" sözünü görmək mümkündür.

Norveçin baş naziri Erna Solberqin sözlərinə əsasən, hökumət Suriyada norveçlinin girov düşdüyündən xəbərdardır.

"Bu, çox ciddi və mürəkkəb məsələdir. Bizim məqsədimiz odur ki, vətəndaşımız sağ-salamat Norveçə qayıtsın", - deyə Solberq bildirib.

O əlavə edib ki, hökumət pul vermək fikrində deyil. Nazir terrorçuların istəklərini yerinə yetirməkdən imtina edir.

Rəşid Mustafazadə

Ölkə.Az