Avropa Parlamenti Azərbaycan əleyhinə qətnamə qəbul etdi
Sənəd parlamentin əksər partiyaları tərəfindən dəstəklənib
Ölkə.Az xəbər verir ki, Avropa Parlamenti Azərbaycan əleyhinə qətnamə qəbul edib.
Layihənin müəllifi Liberal-demokrat fraksiyası (ALDE qrupu) olub. Parlamentarilər təcili və qeyd-şərtsiz jurnalist Xədicə İsmayıl və digər hüquq müdafiəçilərini azadlığa buraxmağa çağırıblar.
Sənəd Avropa Komissiyası ilə üzv ölkələri Azərbaycanda davam edən təqiblərə güclü və birgə cavab verməyə, siyasi təqiblərdə əli olan hakimlər, rəsmilər və siyasətçilərə qarşı sanksiya və viza qadağası məsələlərinə baxmağa çağırır.
Qəbul edilmiş qətnamənin 17-ci bəndinə əsasən, Avropa Parlamenti Avropa İttifaqı Şurasını Azərbaycanda insan haqlarının pozulmasına görə məsuliyyət daşıyan şəxslərə qarşı ünvanlı sanksiyaların mümkünlüyü məsələsinə baxmağa çağırmalıdır. 18-ci bənddə deyilir ki, Avropa Parlamenti Azərbaycan hökumətini ATƏT-in Bakı ofisinin bağlanmasına dair qərarını ləğv etməyə və bu təşkilatla tam əməkdaşlığa dəvət etməlidir.
21-ci bəndə görə, Avropa Parlamenti Avropa İttifaqına üzv dövlətləri, Avropa Xarici Siyasət İdarəsini Azərbaycandakı seçkini müşahidə etməkdən çəkinməyə çağırmalıdır. Buna səbəb kimi hazırkı şərtlər altında istənilən müşahidə missiyasının mənasız olması və çox ciddi qüsurları olan seçki mühitinin legitimləşdirilməsinə xidmət etməkdən başqa bir şey olmayacağı göstərilir.
Sənəd parlamentin əksər partiyaları tərəfindən dəstəklənib.
Rəşid Mustafazadə
Ölkə.Az