Azərbaycanda vəzifəli şəxsin evində işləyən usta lakdan zəhərləndi: "Gəlib maraqlanmır"

Ölkə.Az xəbər verir ki, bu barədə onun qardaşı jurnalist Məğrur Salmanov paylaşım edib. O bildirib ki, hadisə qardaşı Dövlət Gömrük Komitəsində inspektor kimi çalışan birinin obyektində usta işləyən zaman baş verib:

“Qardaşım Nicat Salmanovdur. "Srok"u keçmiş lakı alıb qardaşıma veriblər. Qardaşım bilməyib, lakdan zəhərlənib. 15 gün yataq vəziyyətində qaldı, hələ də özünə gələ bilmir. Zəhərlənmə başqa orqanlara da keçib sıradan çıxarırmış. Özəl klinikalara bir ətək pul tökdük, iki dəfə də gecə saatlarında toksikologiyaya aparmışıq. TƏBİB-çilər sağ olsun, anında xəstəxanaya çatdırdılar. Klinikalara 3-4 min manat xərci çıxdı. Gömrük Komitəsində bu pul “tum pulu” ola bilər. Ancaq bu ailə üçün böyük rəqəmdir. Üstəgəl, 1 aydır işləyə bilmir.”. 

M.Salmanovun sözlərinə görə, qardaşının müalicəsi üçün obyekt sahibi olan vəzifəli şəxs nə baş çəkib, nə də maddi dəstək olub:

“Şahin Bağırovun inspektoru deyib ki, "get, kimə deyirsən, de". Nə qardaşıma, bir dəfə belə baş çəkdi, nə də dəyən ziyanı qarşıladı. İnspektorun işi götürən qohumu ilə görüşdüm, "bizi soruş biləcəksən kimik" dedi. "Müəllim özü də Gömrükdə işləyir" sözünü elə əda ilə dedi ki...”

Jurnalist DGK-nın Mətbuat və İctimaiyyətlə Əlaqələr İdarəsinin rəisi Natiq Axundovla da əlaqə saxladığını, lakin bir aydır heç bir xəbər çıxmadığını söyləyib:

“1 aydır ki, üz-üzdən utanar deyib səsimi çıxarmadım, Natiq Axundovla əlaqə saxladım, fotosunu, əlaqə nömrəsini verdim, dərdimi danışdım. “Gəlsinlər, dəyən ziyanı qarşılasınlar” dedim. Sağ olsun, o danışıb inspektorun rəisinə də deyib, ancaq bir aydır ki, xəbər çıxmır. Məsələ ilə bağlı bütün aidiyyəti orqanlara müraciət edəcəyəm”, - deyə jurnalist əlavə edib.