Ceyms Uorlik: \"Sülh vaxtıdır\"

"İnsanlar sülhə hazırdır"

Ölkə.Az xəbər verir ki, bu fikirləri "Amerikanın səsi"nə müsahibəsində ATƏT-in Minsk qrupunun amerikalı həmsədri Ceyms Uorlik region xalqlarının Dağlıq Qarabağ münaqişəsinin sülhlə həll edilməsinə hazır olub-olmamasından danışaraq söyləyib.

"Biz danışıqlar yolu ilə möhkəm sülhün əldə olunmasına yardım etmək istəyirik. Artıq sülh vaxtıdır və mən hesab edirəm ki, insanlar sülhün regiona gətirəcəyi çiçəklənməyə sevinəcəklər. Əgər biz sülhlə münaqişəni nizamlaya bilsək, region özü dəyişəcək", - deyə Uorlik bildirib.

Onun sözlərinə görə, Azərbaycan və Ermənistan prezidentləri beynəlxalq vasitəçilərə bəyan ediblər ki, danışıqların qüvvətləndirilməsini arzu edirlər və BMT-nin Baş Assambleyası çərçivəsində vasitəçilərin hər iki ölkə XİN-ləri ilə görüşü baş tutacaq. O bildirib ki, sözügedən görüşdə prezidentlər səviyyəsində keçiriləcək danışıqların növbəti mərhələsi hazırlanacaq.

Uorlik Dağlıq Qarabağ münaqişə zonasında zorakılığın artması və vəziyyətin dərinləşməsindən narahatlığını ifadə edib.

"Mən həmsədr təyin olunanda əsas təhlükə cəbhə xətlərində yerləşdirilmiş və bir-birinə atəş açan snayperlər idi. İndi isə taktika dəyişib, hücumlar ağır artilleriya və minaatanlarla həyata keçirilir. Təəssüf ki, biz mülki əhali arasında qurbanların şahidi oluruq. Bu, yolverilməzdir və biz hər iki tərəfi itkilərdən yan keçmək üçün əllərindən gələn hər şeyi etməyə çağırırıq", - deyə Ceyms Uorlik qeyd edib.

O bəyan edib ki, ABŞ etibarın möhkəmləndirilməsi təbdbirlərini dəstəkləyir və məqsədə nail olmaq üçün tərəflərlə işləməyə hazırdır.

"Biz artıq çoxdandır ki, ATƏT çərçivəsində təhqiqat mexanizminin tətbiq olunmasını dəstəkləyir və ümid edirik ki, Azərbaycan da bu mexanizmi tanımağa hazırdır", - deyə diplomat vurğulayıb.

Uorlikin sözlərinə əsasən, nizamlanmaya nail olmaq üçün atəşkəsə hörmət bəsləmək lazımdır.

Rusiya və Qərb arasında fikir ayrılıqlarına toxunan Uorlik yenidən qeyd edib ki, Moskva və Vaşinqton ATƏT-in Minsk qrupu çərçivəsində əməkdaşlıq etməyə davam edir.

"Bildiyiniz kimi, bizimlə Rusiya arasında bir çox gərgin məsələlər var, ancaq Dağlıq Qarabağ onlardan biri deyil. Biz Rusiya ilə Dağlıq Qarabağ münaqişəsinin sülh yolu ilə nizamlanmasına yönəlmiş əməkdaşlığa hazırıq. Mən Rusiya və Fransadan olan həmkarlarımla sıx əməkdaşlıq edirəm və biz mütəmadi görüşürük. Biz Rusiyanın bu prosesdə iştirakını dəstəkləyirik", - deyə Uorlik əlavə edib.

Rəşid Mustafazadə

Ölkə.Az