Məşhur aktyorun çəkildiyi filmin çəkilişləri zamanı təyyarə qəzası baş verdi

Məşhur Hollivud aktyoru Tom Kruzun rol aldığı filmin Kolumbiyada çəkilişlərində istifadə olunan kiçik təyyarənin qəzaya uğraması nəticəsində iki nəfər həyatını itirib.

Bu barədə Cənubi Amerika ölkəsinin Mülki Aviasiya Xidməti məlumat verib.

Ölkə.Az AZƏRTAC-a istinadla xəbər verir ki, hadisə Antiokiya departamentində baş verib. Qəza zamanı Tom Kruzun özü təyyarədə olmasa da, göyərtədəki üç nəfərdən ikisi həlak olub, digəri isə ağır xəsarətlərlə xəstəxanaya çatdırılıb.

Medelinadan Santa-Fe şəhərinə uçan “Piper PA-60” təyyarəsinin qəzaya uğraması səbəbləri hələ ki məlum deyil.

Qeyd edək ki, Tom Kruz məşhur Medelin kartelinə işləyən, eyni zamanda, ABŞ-ın narkotiklərlə mübarizə idarəsinin informatoru olan pilotun həyatından bəhs edən və 2017-ci ilin əvvəllərində başa çatdırılması planlaşdırılan filmdə rol alır.

Ölkə.Az