Ərəb investorların Azərbaycana marağı artacaq - ŞƏRH

83 il əvvəl aşkar edilən Abşeron yatağı, bu gün Azərbaycan üçün Şahdənizdən sonra ən önəmli qaz yatağı sayıla bilər. Çünki bu yataq təkcə 360 milyard m3 olan qaz həcminə görə deyil, həm də bir çox yeniliklərə görə Azərbaycan üçün önəmlidir. 

"Ölkə.Az" xəbər verir ki, bunu iqtisadçı ekspert Eldəniz Əmirov deyib. O bildirib ki, ilk dəfə Azərbaycan şirkəti (SOCAR) belə dərin və çətin şəraitdə bir yatağın operatoru olmuş və bunu uğurla tamamlayaraq, ilkə imza atmışdı: "Burda tətbiq edilən məsafədən mobil idarəçilik də Azərbaycanda ilk hesab edilə bilər. Yataqla bağlı sazişlər də digər yataqdan daha çox və dəyişkən olmuşdur. Beləki, 1997-ci ildə imzalan birinci sazişdə SOCAR 50%, Chevron 30%, Total 20% pay sahibi idi. 2009-cu ildə ikinci saziş SOCAR və Total hər ikisinə 50% payla imzalandı. 

Bu gün isə SOCAR, “TotalEnergies” və Abu Dabi Milli Neft Şirkəti (ADNOC) arasında imzalanma mərasimi keçirilib. Proseslər (satınalma) tamamlandıqdan sonra ADNOC şirkəti Abşeron qaz-kondensat yatağında 30% iştirak payı əldə edəcək, SOCAR və "TotalEnergies" isə hər biri 35%-ə sahib olacaqlar. Bu, həm də ADNOC üçün xarici ölkədə belə sahəyə ilk investiya yatırımıdır". 

Ekspertin sözlərinə görə, hər bir ölkənin həm neft, həm də qeyri-neft sektoruna investiya cəlbinə ciddi ehtiyacı var və ADNOC-un bu gəlişi öz ardınca Azərbaycanda digər sahələrə də öz təsirini göstərə və yeni ərəb investorlarının Azərbaycana marağını artıra bilər.

"Bu yatağın ehtiyatlarının bu gün deyiləndən (360 mlrd m3) çox olacağı şübhəsizdir. Vaxt vardı Şahdənizdə 500 milyard m3 deyilirdi. Hasilat başlanandan son proqnoz 2 dəfədən çox artırıldı. 1,2 trilyon m3 qaz və 240 milyon ton kondensat olduğu təsdiqləndi. Odur "Abşeron"da da surpriz qaçılmazdır", - deyə E. Əmirov əlavə edib.

Könül
Ölkə.Az