Dəmirtaş: "Silaha ehtiyac yoxdur, biz varıq"

""Sülh" deyərək qışqırsaq, bunu Ankara da eşidəcək, Şam da eşidəcək"

Ölkə.Az xəbər verir ki, Xalqların Demokratik Partiyasının (HDP) lideri Səlahəddin Dəmirtaş Muşun Varto bölgəsində etdiyi çıxışında təcili olaraq sülhə ehtiyac olduğunu bəyan edib.

"Kürd problemi dediyimiz isə bir qürur məsələsidir. Allah onu necə yaratdısa, yəni anasından hansı dili öyrənibsə, onu qadağan etməyəcəksiniz. Onu təhqir etməyəcəksiniz. İstədiyi dildə məktəbə gedəcək. İstədiyi dildə dövlət dairəsində xidmət alacaq. İstədiyi dildə şəhərdə qorxmadan danışacaq. İstanbulda kürd olduğu üçün hücuma məruz qalmayacaq. Təəssüf ki, 24 iyuldan bu yana əməliyyatlar davam edir. Biz döyüşün, münaqişənin tərəfdarı deyilik. Yoldaşlarla birlikdə sülh üçün yollardayıq. AKP 400 vəkil üçün bütün ölkəni yandırıb yuya bilər. Çılğın ola bilərlər, dəli ola bilərlər. Silahdan və döyüşdən başqa gözləri heç bir şey görməyə bilər. Amma biz kürd gənclərinə əsla döyüşü, şiddəti təklif etmirik. Silaha ehtiyac yoxdur. Seçdiyiniz vəkillər olaraq ən qabaqda biz varıq. "Sülh" deyərək qışqırsaq, bunu Ankara da eşidəcək, Şam da eşidəcək. Biz sülh istəyirik. Atəşkəs olmalı və söz siyasətə buraxılmalıdır", - deyə Dəmirtaş bildirib.

Xatırladaq ki, bu günlərdə Türkiyənin Şırnak mahalında PKK terrorçuları Jandarma Sərhəd Komandirliyinə bombalı hücum ediblər.

Partlayışda iki polis şəhid olub. Diyarbəkirin Silvan mahalında isə bir polis hücumda şəhid olub. Hadisələr zamanı ümumillikdə 5 polis yaralanıb.

Sentyabrın 6-da Haqqari vilayətinin Dağlıca kəndində basdırılan partlayıcının işə düşməsi nəticəsində 16 hərbçi şəhid olub, 6 nəfər yaralanıb. Hazırda Türkiyə Silahlı Qüvvələri bölgədə geniş miqyaslı antiterror əməliyyatları aparır.

Rəşid Mustafazadə

Ölkə.Az