Avstraliya İŞİD-ə zərbələr endirməyə başladı

"İŞİD-in zirehli personal daşıyıcısını məhv etmişdi"

Ölkə.Az xəbər verir ki, Avstraliyanın hərbi-hava qüvvələri İŞİD terror təşkilatının Suriyadakı mövqelərinə zərbələr endirməyə başlayıblar.

Bu barədə məlumat "The Guardian" qəzetində yer alıb.

"İki gün öncə Avstraliyanın "Hornet" qırıcısı yüksək dəqiqlikli raketlərin köməyi ilə İŞİD-in zirehli personal daşıyıcısını məhv etmişdi", - deyə ölkənin müdafiə naziri Kevin Endrüs bildirib.

Bundan əlavə, Avstraliya qüvvələri yaraqlılara məxsus texnika və neft obyektinə də zərbələr endiriblər. Ölkənin təyyarələri hər gün ABŞ-ın rəhbərlik etdiyi antiterror koalisiyasında iştirak edirlər.

Bir müddət öncə Avstraliya hərbi-hava qüvvələri Suriya ərazisində fəaliyyət göstərən İŞİD terror təşkilatı üzvlərini məhv etməyə başlayacaqlarını bildirmişdilər.

Avstraliyanın sabiq baş naziri Toni Ebbotun sözlərinə görə, Suriyada İŞİD-i məhv etmədən İraqda qalib gəlmək mümkünsüzdür.

İraq Şam İslam Dövləti (İŞİD) İraq və Suriya ərazisində fəaliyyət göstərən silahlı paramilitar qruplaşmadır. İŞİD 3 yanvar 2014-cü il tarixində müstəqilliyini, 29 iyun 2014-cü il tarixində isə yeni xilafət yarandığını elan etmiş tanınmamış dövlət hesab olunur.

Rəşid Mustafazadə

Ölkə.Az