Elman Nəsirov: "Namizədliyimin irəli sürüləcəyindən xəbərsiz idim"

Dünən hakim Yeni Azərbaycan Partiyasının deputatlığa namizədlərinin siyahısı açıqlandı.

Namizədlər arasında bu dəfə xeyli sayda fərqli simalar var. Onlardan biri də, politoloq Elman Nəsirovdur.

Politoloq Elman Nəsirov həm özünün namizədliliyi, həm də YAP-ın namizədləri haqqında fikirlərini Ölkə.Az-la bölüşüb:

"Açığı namizədliyimin irəli sürüləcəyindən xəbərsiz idim. Yalnız ondan xəbərim var idi ki, partiya rəhbərliyinin mənə çox müsbət münasibəti var. Eyni zamanda YAP-ın beynəlxalaq münasibətlər komissiyasının katibi idim. Buna baxmayaraq qərarı partiya rəhbərliyi verirdi və birmənalı şəkildə heç kim heç nə deyə bilməzdi. Ürəyimdə fikirləşirdim ki, namizədliyim partiya tərəfindən irəli sürülə bilər, ancaq bunu dəqiq bilmirdim. YAP regionun ən böyük partiyasıdır. Ona görə onun kadr potensialı da böyükdür. Belə seçim imkanının geniş fonunda namizəd olma məsələsi elə də asan məsələ deyil. Mənə etimad göstərdiyi üçün ölkə prezidenti və YAP sədri İlham Əliyevə təşəkkür edirəm.

YAP-ın digər namizədlərinə gəldikdə isə partiyanın quruculuğunda xüsusi xidmətləri olan, Azərbaycanın inkişafında böyük xidmətlər göstərmiş şəxslərlə yanaşı gənclər də siyahıda yer alıblar. 2010-cu il parlament seçkilərində YAP-ın namizədlərindən 71-i deputat mandatı qazanıb. Gəlin nəzərə alaq ki, YAP-ın cəmiyyətdə nüfuzu ilbəil artır. 5 il ərzində partiya daha da inkişaf edib, tərkibi daha da genişlənib. Məsələyə məntiqlə yanaşsaq, məncə 5 il bundan əvvəlki nəticə təmin olunacaq və bəlkə daha da çox namizəd Milli Məclisə deputatlıq mandatı qazanacaq".

Səxavət Məmməd
Ölkə.Az