Qafqaz universitetini ABU-nun taleyi gözləyir?

Qafqaz universitetinin tələbələrindən və onların valideyinlərindən redaksiyamıza daxil olan çoxsaylı müraciətlər bizi bu məsələni qabartmağa vadar etdi.

Müraciət edənlər universitet rəhbərliyinin təhsil ocağının taleyinin necə olacağı barədə valideyinlərin suallarına verdiyi qeyri-dəqiq və yöndəmsiz cavablardan şübhələnərək, Qafqaz universitetinin də ABU kimi bağlanacağını düşünürlər.

Qafqaz universitetində oxuyan və ora qəbul olan tələbələr rəhbərliyin müəmmalı susqunluğunu heç cür anlaya bilmirlər.

Xatırladırıq ki, son aylar universitet ətrafında böyüyən söz-söhbətlər onun bağlanmaq təhlükəsi qarşısında olduğunu düşünməyə əsas vermişdi. Təhsil nazirliyinin təhsil ocağında apardığı yoxlamalar, burada baş vermiş qanunsuzluq faktları, nazirlikdə qeydiyyatı olmayan abituriyentlərin universitetdə oxuması, bu təhsil müəssisəsini ictimaiyyətin diqqət mərkəzinə çevirmişdi. Hazırda təhsil ocağının fəaliyyətini yüz faiz davam etdirib etdirməyəcəyi məlum deyil.

Mövzunu araşdırırıq və universitet haqqında əldə etdiyimiz məlumatları oxucularımızla bölüşəcəyik (Redaksiya)