Füzuli şəhərində əsl Qarabağ xalçası təqdim edilib

Oktyabrın 17-si Füzuli şəhərində ilk dəfə qeyd edilən “Şəhər Günü”ndə 44 günlük Vətən müharibəsinə həsr olunmuş “44” xalça kolleksiyası və əsasən Füzuli rayonunda toxunan əsl Qarabağ xalçası “Horadiz” və ya “Buynuz” xalçasının virtual şəkildə toxunması, dəyişməsi və emal olunma prosesi təqdim edilib.

Bu barədə “Ölkə.Az”a “Azərxalça” ASC-dən məlumat verilib.

Qeyd edək ki, “Horadiz” və ya “Buynuz” adlanan xovlu xalça ilk dəfə toxunduğu məkanın adı ilə (Horadiz qəsəbəsi, Füzuli rayonu, Qarabağ) adlandırılsa da, sonradan kompozisiyasının naxış elementinin xarakterik cəhətlərini nəzərə alaraq “Buynuz” adını alıb. Belə xalçalar sonradan Füzuli rayonunun müxtəlif yaşayış məntəqələrində toxunub. Qədimdən Mərkəzi Asiya, Yaxın Şərq, o cümlədən Azərbaycanda buynuzlu heyvanlar müqəddəs sayılırdı. Bu da xalq arasında “güc”, “qoçaqlıq” və “ərənlik”, eyni zamanda səmavi məna daşıyırdı. Qədim Türk xalqlarının əksəriyyətində, o cümlədən Azərbaycanda davar və iribuynuzlu heyvanlar var-dövlət rəmzi kimi qəbul olunub. Buğalar, qoçlar Türk xalqlarının məişətində və mədəniyyətində iz buraxmış, eyni zamanda xalçalarımızda da stilizə olunmuş naxışlara çevrilib.

Həmçinin qurumun çıxış etdiyi proqrama müasir Azərbaycanın memarı, Ümummilli Lider Heydər Əliyevin 100 illik yubileyinə həsr olunan 100x100 ölçüsündəki, yalnız 100 nüsxədə toxunmuş “Azərxalça” ASC-nin “Can Azərbaycan” MMC ilə birgə layihəsi olan “Heydər Əliyev-100” xalça kolleksiyasından nadir xalça da daxil olub.