Cedi Osmanın Hidayet Türkoğluna cavabı gecikmədi

NBA komandalarından olan "San Antonio Spurs"da çıxış edən basketbolçu Cedi Osmanın TBF prezidenti Hidayət Türkoğlunun açıqlamalarına cavabı gecikmədi.

Ölkə.Az xəbər verir ki, basketbolçu öz sosial şəbəkə hesabında paylaşım edib.

"Dünyanın çox daha vacib məsələlər və ağrılarla sınaqdan keçirildiyi günlərdə şəxsi məsələ ilə bağlı sizi narahat etmək istəməzdim. Ömrüm boyu formasını qürurla daşıdığım Milli Komandanın müzakirə mövzusu olmağı məni çox kədərləndirir. Məhz buna görə də məncə, faktlar bilinməlidir.

Bu günə kimi bütün kateqoriyalar üzrə 178 dəfə milli formanı geyinmişəm. Nə olursa olsun tapşırıq veriləndə əlimdən gələni etməyə çalışdım. NBA-da son 6 mövsüm olmaqla ümumilikdə 10 ildir ki ən yüksək səviyyədə basketbol oynayıram. Bu illərin zehni və fiziki yorğunluğunun sağlamlığıma təsir etdiyini anlamağa başladım. 2 iyun 2023-cü ildə heç kimin zərər görməməsi üçün milli komandanın heyəti açıqlanmamışdan əvvəl federasiya rəsmiləri ilə görüşdüm və builki FİBA Olimpiya Təsnifat Turniri üçün icazə istədim

Bu dövrü dincəlmək, reabilitasiya etmək istədiyimi dedim. İclasda federasiya prezidentimiz Hidayət Türkoğlu və milli komandamızın rəsmiləri də iştirak edirdi. Onlar məsələyə müsbət yanaşdılar, bəyəndilər, hətta yarana biləcək hər hansı mənfi təsəvvürdən məni qorumaq istədiklərini bildirdilər.

Milli formadan imtina etməmişəm.Mənim üçün “Aypara-Ulduz” formasından dəyərli forma yoxdur, amma heç kimin məni ictimaiyyət qarşısında qoymasına icazə vermərəm. Bilmənizi istəyirəm ki, mənə qarşı irəli sürülən ittihamları heç vaxt qəbul etmirəm və həqiqəti deməyə davam edəcəyəm”.

Xatırladaq ki, daha öncə Türkiyə Basketbol Federasiyasının prezidenti Hidayət Türkoğlu Cedi Osmanın milli formanı geyinmək istəmədiyini bildirib.

Günay