“106 milyon manatın taleyi sual altındadır”

Lisenziyası ləğv edilən "Muğan Bank" ASC-də 217 milyon manata yaxın sığortalanmış (kompensasiya olunan) əmanət var.

"Ölkə.Az" xəbər verir ki, bu barədə Mərkəzi Bankın məlumatında qeyd olunub.

Bildirilir ki, "Muğan Bank” Əmanətlərin Sığortalanması Fondunun üzvüdür, əhalinin bu bankdakı sığortalanmış əmanətləri üzrə kompensasiyalar qanunvericiliyə uyğun qaydada ödəniləcək. Bankın əmanətçilərinin say etibarı ilə 99,9%-nin əmanətləri kompensasiya olunacaq. Bankın digər öhdəliklərini isə məhkəmənin təyin edəcəyi ləğvedici qanunvericiliyə müvafiq qaydada tənzimləyəcək.

İqtisadçı ekspert Samir Əliyev isə deyib ki, bankda qalan 106 milyon manatlıq sığortalanmayan depozitin taleyi sual altındadır.

"Cari ilin oktyabrın 1-nə "Muğanbank" ASC-nin depozit portfelinin həcmi 322,5 milyon manat olub.  Mərkəzi Bank açıqlamasında bildirib ki, bu müddətə Bank üzrə sığortalanmış əmanətlər 216,7 milyon manat təşkil edir. Deməli, hardasa,106 milyon manatlıq vəsaitin taleyi sual altındadır", - deyə ekspert bildirib.

Qeyd edək ki, Azərbaycan Respublikası Mərkəzi Bankının İdarə Heyətinin 18 oktyabr 2023-cü il tarixli Qərarı ilə “Muğan Bank” ASC-nin lisenziyası 19 oktyabr 2023-cü il tarixindən etibarən ləğv edilib.

Könül
Ölkə.Az