Azərbaycanda işləyən əcnəbilərin sayı açıqlandı

Bu ilin sentyabrın 1-nə olan statistikaya əsasən, cari ilin əvvəli ilə müqayisədə Dövlət Sosial Müdafiə Fondunun fərdi uçot sistemində qeydiyyata alınan əcnəbilərin sayı 16,21 faiz artıb.

DSMF-nin ictimaiyyətlə əlaqələr sektorundan Ölkə.Az-a verilən məlumata görə, avqust ayı ərzində əlavə olaraq 558 nəfər əcnəbi vətəndaş qeydiyyata alınıb və nəticədə fərdi uçot sistemindəki əcnəbilərin sayı 26 175 nəfərə yüksəlib.

Dövlət sosial sığorta sistemində fərdi şəxsi hesabı olan əcnəbilərin 88,3 faizini (23 114 nəfər) kişilər, 11,7 faizini (3 061 nəfər) isə qadınlar təşkil edir.

Ümumilikdə 114 ölkənin vətəndaşlarını əhatə edən əcnəbilər arasında ən yüksək say göstəricisi Türkiyə vətəndaşları (13 326 nəfər) üzrə müşahidə olunur. Fərdi uçot sistemində qeydiyyata alınan əcnəbilərin sayına görə ikinci yerdə gələn Gürcüstan vətəndaşlarının sayı 2 873 nəfərə, üçüncü yerdə gələn Rusiya Federasiyasının vətəndaşlarının sayı isə 1 546 nəfərə çatıb.

Sonrakı yerlərdə İran İslam Respublikası (954), Hindistan (881), Çin Xalq Respublikası (837), Böyük Britaniya və Şimali İrlandiya Krallığı (532), Pakistan İslam Respublikası (520), Ukrayna (378), Banqladeş Xalq Respublikası (345), Özbəkistan (264), Almaniya Federativ Respublikası (231), ABŞ (220), Filippin Respublikası (220), Türkmənistan Respublikası (205), Qazaxıstan Respublikası (196), Koreya (188), İtaliya Respublikası (184), və s. ölkələr qərarlaşıb.

Ölkə.Az