Nənənin küçəyə atdığı körpələrin vəziyyəti açıqlandı - YENİLƏNİB
Tibbi Ərazi Bölmələrini İdarəetmə Birliyi (TƏBİB) Gəncə şəhərində küçəyə atılan körpələrin səhhəti barədə açıqlama verib.
TƏBİB-dən bildirilib ki, Gəncə Şəhər İcra Hakimiyyətinin nümayəndələri tərəfindən Gəncə Şəhər Birləşmiş Xəstəxanasının nəzdindəki Uşaq Xəstəxanasının Təcili Tibbi Yardım Şöbəsinə iki uşaq - iki yaşlı oğlan və dörd aylıq bacısı gətirilib:
“Onlara zəruri tibbi xidmətlər göstərilib. Hazırda tibb müəssisəsinin Pediatriya Şöbəsində müalicələri davam etdirilir. Vəziyyətləri stabildir”.
***
Gəncə şəhərində bir gündə iki uşaq küçəyə atılıb.
APA-nın yerli bürosunun əldə etdiyi məlumata görə, uşaqların qəyyumu olan nənə əvvəlcə dörd aylıq körpəni, sonra isə onun 4 yaşlı qardaşını Gəncə Şəhər İcra Hakimiyyətinin binasının qarşısına qoyub.
Həmin uşaqlar şəhərin mərkəzində tapılaraq Gəncə Şəhər Uşaq Xəstəxanasına gətiriliblər.
