Mesajımızı başa düşməsələr, lazım olan hər şeyi edəcəyik - ABŞ təhdid etdi

"İnqilab keşikçiləri İran lideri (Əli Xameneyi) üçün işləyirlər. Onlar İraq və Suriyada əsgərlərimizə hücum etmək üçün milis qruplarını hazırlayır, dəstəkləyir və istiqamətləndirirlər".

Ölkə.Az xəbər verir ki, bu sözləri "Fox News"a Ağ Evin Milli Təhlükəsizlik Şurasının sözçüsü Con Kirbi deyib. O, İran İnqilabı Keşikçiləri Korpusunun istifadə etdiyi obyektlərə endirilən hava zərbələri ilə bağlı danışarkən bunları deyib:

“Biz İranı məsuliyyətə cəlb etdiyimizi göstərdik”.

İran İnqilab Keşikçiləri Korpusunun cinayətlərini görməzlikdən gəlməyəcəklərini ifadə edən Kirbi bölgələrdə ABŞ əsgərlərinə qarşı hücumların davam edəcəyi təqdirdə ABŞ ordusunun "lazım olan hər şeyi edəcəyini" vurğulayıb.

"Ümid edirəm ki, onlar bizim mesajımızı başa düşürlər. Əgər başa düşməsələr və prezidentin dediyi kimi hücumları davam edərsə, biz cavab verməyə davam edəcəyik".

Qeyd edək ki, ABŞ Suriyanın şərqində İran İnqilab Keşikçiləri Korpusunun və onların nəzarəti altında olan qrupların istifadə etdiyi iki obyektə hava zərbələri endirib.
Pentaqon 17-24 oktyabr tarixləri arasında ABŞ və koalisiya qüvvələrinə aid İraqda 10, suriyada 3-ü olmaqla ümumilikdə 13 hücum həyata keçirildiyini açıqlamışdı.
Səlahiyyətlilər hücumları həyata keçirən qrupların İran İnqilab Keşikçiləri tərəfindən dəstəkləndiyini bildiklərini qeyd etmişdi.

Billurə