Evə silahlı basqın, 6 il sonra alınan qısas, salonda öldürülən qadın... - Ötən kabus həftə
Ötən həftə paytaxtda və bölgələrdə baş verən qətl hadisələri ilə yadda qaldı. Sumqayıt, Cəlilabad, Şəki, Astara və s... Şəki demişkən hətta bir gün də Şəkidən 3 qətl hadisə xəbəri gəldi.
Məsələn başlayaq elə Şəki şəhərinin Aşağı Küngüt kəndindən. Oktyabrın 26-ı saat 16 radələrində kürəkən və qaynın mübahisəsi sonda kürəkənin ölümü ilə nəticələnib.
Araşdırma zamanı 1988-ci il təvəllüdlü Şəki rayon Aşağı Küngüt kənd sakini Cavid İsayevin aralarında yaranmış mübahisə zamanı kürəkəni, 1982-ci il təvəllüdlü, Oğuz rayon sakini Asif Həşimovu öz avtomobilində bıçaqla xəsarətlər yetirərək qəsdən öldürməsinə əsaslı şübhələr müəyyən edilib.
Hadisədən sonra Cavid İsayev istintaqa könüllü təslim olub və şübhəli şəxs qismində tutulub.
Ona qarşı, cinayət məcəlləsinin 120.1-ci (qəsdən adam öldürmə) maddəsilə cinayət işi başlanaraq ibtidai istintaq aparılır.
*********
Digər qanlı hadisə isə Şəki şəhəri Mirzə Fətəli Axundov prospektində, Giləhli məhəlləsində baş verib. Yetkinlik yaşına çatmayan Samir Babayevin (şərti ad) 35 yaşlı Tehran Mustafayevə kəsici-deşici alətlə xəsarət yetirərək qəsdən öldürməsinə əsaslı şübhələr müəyyən edilib.
Qətlə yetirilən Tehran Mustafayevin atası Qüdrət Mustafayev bildirib ki, oğlu Xan Sarayı ərazisində halva satışı ilə məşğul olub.
O, qətlin törədilməsinə səbəb kimi oğlu ilə hadisəni törətməkdə şübhəli bilinən yeniyetmə arasında yaranan mübahisəni göstərib. Atanın sözlərinə görə, yeniyetmə ailəsi ilə birlikdə mağaza işlədir. Oğlu Tehran da tez-tez mağazaya gedərək alış-veriş edib. Nə baş veribsə, elə mağazada olub və daha sonra qətl törədilib:
"Oğlum ailəli idi, iki uşağı var idi. İşdən gələndə oğlum dükana gedərək alver edib, çıxanda ayağın ilişib yıxılıb. Durub həmin yeniyetməyə bir sillə vurub. Sonra o da bununla "haqq-hesab" etməyə gəlib. Uşaq da Şəkidəndir, "Yuxarı Baş"dandır. Aralarında adi bir münaqişə olub və oğlum ölüb".
Qeyd edək ki, qətli törətməkdə şübhəli bilinən yeniyetmə evin tək oğlu olub. Qətlə yetirilən Tehran Mustafayev də ailənin tək oğul övladı olub. Onun 2 övladı var. Faktla bağlı Şəki rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanılıb, Samir Babayev (şərti ad) şübhəli şəxs qismində tutulub.
*******
Cəlilabadda qisas məqsədi ilə qətl hadisəsi baş verib. Oktyabrın 24-də 1977-ci il təvəllüdlü Xaqani Əhmədlinin kəsilmiş-deşilmiş xəsarətlərdən ölməsi barədə rayon prokurorluğuna məlumat daxil olub.
Faktla bağlı Cəlilabad Rayon Prokurorluğunda başlanmış cinayət işi üzrə 1998-ci il təvəllüdlü Böyükxan Muradlı Cinayət Məcəlləsinin 120.1-ci (qəsdən adam öldürmə) maddəsilə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib.
Məlumata görə qətlə yetirilən 1977-ci il təvəllüdlüdlü Mirxəqani Əhmədov 6 ildir məhkumluq həyatı yaşayır və yenicə azadlığa çıxıb.
M.Əhmədov vaxtıilə qətli törətməkdə şübhəli bilinən Böyükxan Muradlının atasını döyərək onun sağlamlığına ciddi zərbələr vurub.
Hadisənində bu səbəbdən qisas məqsədi ilə törədildiyi ehtimal edilir.
******
Həftə sonu isə Astara rayonunda 1983-cü il təvəllüdlü Burhan Vahabovun öldürülməsi barədə rayon prokurorluğuna məlumat daxil olub.
Astara rayon prokurorluğundan verilən məlumata görə, araşdırma zamanı 2005-ci il təvəllüdlü Pərviz Əhmədovun rayonun Pəlikəş kəndi ərazisində aralarında yaranmış mübahisə zamanı Burhan Vahabovu odlu silahdan bir dəfə atəş açaraq qəsdən öldürməsinə əsaslı şübhələr müəyyən edilib.
Faktla bağlı Astara rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb, Pərviz Əhmədov şübhəli şəxs qismində tutulub.
******
Paytaxt ərazisində baş verən qətl hadisələrinə keçməzdən əvvəl oktyabrın 28-də Sumqayıt şəhərinin Corat bağları yaşayış massivində baş verən qanlı hadisəni nəzərinizə çatdırmaq istəyirəm.
Belə ki, silahlı hücumu törədən şəxs 16-cı mikrorayonda yerləşən “Corat bağları” adlanan yaşayış massivində fərdi yaşayış evinə gəlib. Bu zaman əlindəki ov tüfəngi ilə 1985-ci il təvəllüdlü Karakaş Suzannanı və atası 1950-ci il təvəllüdlü Dağbəyi Fərəcovu öldürüb.
Daha sonra isə Serkan Karakaşı və D.Fərəcovun həyat yoldaşı Tərlan Fərəcovanı da vurub.
Silah səsinə qonşular hadisə yerinə gəliblər. Bu zaman 1958-ci il təvəllüdlü Mehman Mahmud oğlu Sarıyev, 1990-cı il təvəllüdlü Etibar Mahmud oğlu Sarıyev də xəsarət alıblar.
Onlar ağır vəziyyətdə xəstəxanaya yerləşdiriliblər.
Sumqayıt Şəhər Prokurorluğundan verilən məlumata prokurorluq və polis əməkdaşları tərəfindən kriminalist və ekspertlərin iştirakı ilə hadisə yerinə və meyitlərə baxış keçirilib, digər zəruri hərəkətlər aparılıb və iş üzrə əhəmiyyət kəsb edən sübutlar götürülüb.
Faktla bağlı Cinayət Məcəlləsinin müvafiq maddələrilə cinayət işi açılıb.
Cinayəti törətməkdə şübhəli bilinən 1987-ci il təvəllüdlü Tağıyev Müşviq Məhəmməd oğlu saxlanılıb.
*****
Xətai rayonunda keçmiş ər gözəllik salonunda arvadını bıçaqlayaraq qətlə yetirib.
Oktyabrın 26-sı 1987-ci il təvəllüdlü Pərvanə Tanrıverdiyevanın ölməsi barədə Xətairayon prokurorluğuna məlumat daxil olub.
Araşdırmalarla 1982-ci il təvəllüdlü Zamin Tanrıverdiyevin Xətai rayonu ərazisində yerləşən gözəllik salonlarının birində aralarında yaranmış mübahisə zamanı keçmiş arvadı Pərvanə Tanrıverdiyevaya kəsici-deşici alətlə xəsarətlər yetirərək qəsdən öldürməsinə əsaslı şübhələr müəyyən edilib.
Faktla bağlı Xətai rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb, Zamin Tanrıverdiyev şübhəli şəxs qismində tutulub.
****
Sabunçu rayonunnun Zabrat qəsəbəsində isə 53 yaşlı Firdovsi Nəcəfovun qəsdən öldürülməsi barədə rayon prokurorluğuna məlumat daxil olub.
Araşdırma zamanı 1988-ci il təvəllüdlü Adil Əsgərovun qəsəbə ərazisində aralarında yaranmış mübahisə zamanı tanışı Firdovsi Nəcəfovu dəmir parçası ilə vuraraq qəsdən öldürməsinə əsaslı şübhələr müəyyən edilib.
Faktla bağlı Sabunçu rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb, Adil Əsgərov şübhəli şəxs qismində tutulub.
******
Oktyabrın 24-də Nəsimi rayonunda əvvəllər məhkum olunmuş Araz Həsənov qətlə yetirilib. Cinayəti törətməkdə şübhəlıi bilinən tanışı 1963-cü il təvəllüdlü Abbasov Səyavuş Nəriman oğlu saxlanılıb.
Və s.., və s..., və s...
Çalışın cinayətdən və cinayətkarlardan uzaq olun. Unutumayın ki, şah qanun deyil, qanun şahdi ona görədə çalışın qanundan kənara çıxmayın.