85 yaşlı qonşusunu armaturla vurub öldürdü

Bakıda qonşusunu qətlə yetirməkdə təqsirli bilinən Sakit Mirzəyevin (adlar şərtidir) cinayət işi üzrə təfərrüatlar məlum olub.

"Ölkə.Az" xəbər verir ki, hadisə Sabunçu rayonunda baş verib. Rayonun Yeni Ramana qəsəbəsində 85 yaşlı Əkrəm Tağızadənin üzərində zorakılıq əlamətləri olan meyiti yaşadığı evində tapılıb.

12-ci polis şöbəsinin əməkdaşları tərəfindən keçirilən əməliyyat təbirləri nəticəsində paytaxt sakini əvvəllər məhkum olunmuş Sakit Mirzəyev saxlanılıb.

Məlum olub ki, yaşlı insan baş nahiyyəsindən küt alətlə aldığı zərbələr nəticəsində vəfat edib.

Təqsirləndirilən şəxs qismində dindirilən Sakit Mirzəyev ifadəsində bildirib ki, qonşuluqda yaşayan Əkrəm Tağızadə və onun ailə üzvlərini 2106-cı ildən tanıyıb.

Hadisədən 4 ay əvvəl Əkrəmin oğlu Kamran və arvadı Tahirə ilə onun həyat yoldaşı arasında münasibətlər pisləşib.

2018-ci il avqustun 20-də səhər işə getməyə hazırlaşanda Əkrəm pəncərədən onu evinə çağırıb. Həmin vaxt qonşusu evdə tək olub: " Saat 10-un yarısı olardı məni çağırdı pəncərədən evlərinə. Məndə getdim elə təzə oturmuşdum aramızda başladı mübahisə düşməyə. Mən onu itələdim oda məni kürəyimdəm vurdu. Sonra əsəbləşdim armaturnan başından vurdum. Ölməsi üçün vurmamışdım. Vurdum dedim yaralanar oda öldü".

Sakit Mirzəyev hadisədən sonra hamam otağında dəmir aləti yuyub və həyətdə olan dolabın içərisində gizlədib.

Evə gedərək axırıncı dəfə ailə üzvləri ilə görüşdükdən sonra təslim olmaq üçün polisə getməyə qərar verib. Evin yaxınlığında polis əməkdaşları tərəfindən saxlanılaraq 12-ci polis şöbəsinə gətirilib. Orada baş vermiş hadisəni danışaraq əməlindən peşman olduğunu bildirib.
Məhkəmə prosesində Sakit Mirzəyev ittiham üzrə özünü qismən təqsirli bilib.

Zərərçəkmiş şəxsin hüquqi varisi təqsirləndirilən şəxsi bağışladığını və məhkəmədən ona yüngül cəza verilməsini xahiş edib.

Məhkəmə hesab edib ki, Sakit Mirzəyevin əməli CM-nin 120.2.2-ci (xuliqanlıq niyyəti ilə qəsdən adam öldürmə),120.2.4-cü ( xüsusi amansızlıqla qəsdən adam öldürmə) və 120.2.9-cu (köməksiz vəziyyətdə olan adamı qəsdən öldümə) maddələri ilə düzgün tövsif edilib.

Sonda məhkəmənin hökmü ilə Sakit Mirzəyev 18 il müddətinə azadlıqdan məhrum olunub.