ADY tenderi gündəm oldu: anormal xərc, yoxsa... - AÇIQLAMA

“Azərbaycan Dəmir Yolları" QSC-nin (ADY) həyata keçirdiyi tender birmənalı qarşılanmayıb. 

"Ölkə.Az" xəbər verir ki, qurum "İKT təhlükəsizlik məhsulları və lisenziyalarının yenilənməsinin satın alınması", "Müvafiq stansiyaların naqilsiz internet ilə təmin edilməsinin satın alınması", "İKT təhlükəsizlik məhsulları və lisenziyalarının yenilənməsinin satın alınması" və “Microsoft” məhsullarının satın alınması" ilə bağlı "SMARTIT" MMC, "B2B GROUP" MMC, "İNFİNİTECH" MMC və "BUZ TECH" MMC şirkətləri ilə müvafiq olaraq 4 milyon 307 min manatlıq, "B2B GROUP" MMC ilə 985 min manatlıq, "İNFİNİTECH" MMC ilə 1 milyon 67 min  manatlıq, "BUZ TECH" MMC ilə 1 milyon 731 min müqavilə imzalayıb.

Bir sıra şəxslər sözügedən xidmətlər üzrə ödənən məbləğlərin yüksək olduğunu düşünür.

İqtisadçı ekspert Natiq Cəfərli isə deyir ki, tenderlər bu ölkədə ən “qaranlıq” sahə olsa da, ADY-nin belə məlumatları ictimayyətlə bölüşməsi yaxşı tendensiyadır:

"Bəzi insanlar bu məlumatları “düz məntiqlə” dəyərləndiriblər və dövlət orqanlarını şəffaf işləməyə təşviq etməkdənsə, təşəbbüsü “cəzalandırmaqla” məşğuldurlar. 

Bu tipli tender və məbləğdə ən çox müzakirə ediləsi məsələlərdən biri odur ki, satınalmalara dövlət (şirkət, büdcə - fərq etməz) pul ayırır, lakin onun 18%-ni yenidən büdcəyə ƏDV kimi geri alır. Nəticədə qiymətlər daha yuxarı olur".

Ekspertin sözlərinə görə, bu tenderdə 360 yeni kompyuter alınacaq, 4200 kompyuterin isə lesenziyalı proqram təminatı yenilənəcək: "Bundan başqa kompyuterlərin və proqram təminatının zəmanət xərcləri də var. “Düz məntiqlə” məbləğı kompyuter sayına bölmək, ortalama qiymət çıxartmaq doğru deyil, yəni, yanaşma daha qəliz hesablamalara dayanmalıdır. Lesenziyalı məhsulların bahalı olduğunu nəzərə almaq lazımdır. Biz öyrəşmişik ki, kompyuter alıb ustanın "fleş-kartında" olan lisenziyasız proqramları 15-20 manata yükləyiriksə, şirkətlər də bunu edə bilər. Lakin amma belə olmur".

"Dövlət şirkətləri tenderin mənfi imicini dəyişmək üçün daha şəffaf, daha açıq olmalıdırlar və əgər ADY ictimayyətlə məlumatlar bölüşürsə, bu daha peşəkarcasına müzakirə edilərək şəffaflığı stimullaşdırmalıdır", - deyə N. Cəfərli əlavə edib.

Könül
Ölkə.Az