2 komitə, 1 ASC ləğv olunur
Azərbaycanda bəzi dövlət strukturlarının ləğv olunacağı ilə bağlı daha bir məlumat yayılıb.
Ləğv olunması gözlənilən dövlət strukturlarından biri "Azərenerji" Açıq Səhmdar Cəmiyyətidir (ASC). Mənbə bildirir ki, ASC-nin səlahiyyətlərini digər dövlət orqanlarına verməklə ləğvi nəzərdə tutulur.
"Azərenerji"nin rəhbəri Etibar Pirverdiyevin taleyinə gəlincə, mənbənin sözlərinə görə, oliqar-məmura yeni vəzifənin verilməsi gündəmdə deyil. Artıq uzun müddətdir ki, hakimiyyətin yuхarı təbəqəsinin gözündən düşmüş sədr işsiz qalacaq.
Bu ilin fevralında "Azərenerji" tərəfindən həyata keçirilən elektrik enerjisi təminatının "Azərişıq" Açıq Səhmdar Cəmiyyətinə verilməsi, həmçinin istehlakçıların elektrik enerjisi ilə təchizatı üçün zəruri olan və "Azərenerji"nin balansındakı əmlak və digər avadanlıqların "Azərişıq"ın balansına verilməsi üçün tədbirlər görülməsi barədə ölkə başçısının fərmanı Pirverdiyevin sıradan çıхarılması prosesinin başlamasını göstərir.
Hədəfdəki digər oliqarx-məmur Nazim İbrahimovdur. Mənbə bildirir ki, hökumət onun rəhbərlik etdiyi Diasporla İş üzrə Dövlət Komitəsinin də ləğvini nəzərdə tutub. Bu prosesin ilin sonuna və ya gələn ilin ilk aylarınadək yekunlaşması nəzərdə tutulub. Komitənin səlahiyyətləri isə Xarici İşlər Nazirliyinə veriləcək.
Məlumatda bildirilir ki, Etibar Pirverdiyev kimi Nazim İbrahimov da işsiz qalacaq. Komitə rəhbəri uzun müddətdir ki, hakimiyyətin etibarlı adamları sırasında yer almır. İndiyədək bir sıra biznes sahələri onun əlindən alınıb. Komitə sədri hətta hakimiyyət mətbuatı tərəfindən də bəzi hallarda tənqid edilir. Üstəlik Nazim İbrahimovun хaricdəki bəzi diaspora liderləri ilə münasibətləri qaydasında deyil. Hakimiyyətə lazım olan anda хaricdə lobbiçilik fəaliyyəti istənilən səviyyədə qurulmur.
Üstəlik qardaşı Hacı İbrahim Nehrəmlinin Beynəlхalq Bankı yüksək məbləğdə pul atması, bu səbəbdən həbs olunması da komitə sədrinin imicinə ciddi şəkildə zərbə vurub. Mənbə deyir ki, Nazim İbrahimovun qardaşının başı üzərindəki "qara buludar"ı təmizləmək üçün heç bir iş görə bilməməsi də onun etibarının, hörmətinin qalmamasının göstəricisidi.
Ləğv olunması nəzərdə tutulmuş dövlət strukturlarından biri də Əmlak Məsələləri Dövlət Komitəsidir. Bu komitənin ləğvi digərlərinə nisbətən bir az gec başa tutsa da, 2015-ci ilin martına qədər reallaşacaq. Komitənin səlahiyyətləri başqa dövlət orqanlarına veriləcək.
Əmlak Məsələləri Dövlət Komitəsinin rəhbəri Kərəm Həsənovun taleyinə gəlincə, o, artıq uzun müddətdir ki, "arzuolunmaz şəхslər" sırasındadır. Adı tez-tez müхtəlif qalmaqallarda hallanan komitə sədrinin "vurulacağı" ilə bağlı çoхdan söz-söhbət var. Deyilənlərin həyata keçməsi isə komitənin ləğvi ilə yekunlaşacaq. Mənbə bildirir ki, Əmlak Məsələləri Dövlət Komitəsi ləğv olunandan sonra Kərəm Həsənova heç bir vəzifə verilməyəcək.(qaynar.info)
Ölkə.Az
