Ərdoğan: Qərb aciz və qorxaqdır

Türkiyə prezidenti Rəcəb Tayyib Ərdoğan Səudiyyə Ərəbistanı paytaxtı   Ər-Riyadda keçirilən Qəzza Zirvəsində çıxışı zamanı Qərbi Qəzzada törədilən qətliamlara səssiz qalmasını acizlik və qorxaqlıq nümunəsi kimi dəyərləndirib.

Ölkə.Az xəbər verir ki, prezident Ərdoğan  Qəzzada atəşkəsin əldə edilməsi çağırışı ilə çıxış edib.

“Qəzzada zülmə qarşı susanlar da zalımlar qədər qana şərikdir. Hər zaman insan hüquq və azadlıqlarından danışan Qərb ölkələrinin Fələstində davam edən qırğınlar qarşısında susması utancvericidir. Qərbin münasibəti acizlik və qorxaqlıqdır. Bütün dövlət liderləri "Çarli Hebdo" hadisələri zamanı yürüş edərkən Fələstində on minlərlə insan ölür, lakin onların heç biri barmağını tərpətmir”, - Ərdoğan bildirib. 

O eyni zamanda Qəzzanın yenidən qurulması və dirçəldilməsinə dəstək mesajı verib: “Qəzzanın yenidən qurulması üçün İslam Əməkdaşlıq Təşkilatı çərçivəsində fond yaradılmalıdır. 

Türkiyə olaraq Qəzzanın inşasına və dirçəldilməsinə hər cür dəstəyi verəcəyik”. 

Ərdoğan əlavə edib ki,  Qüds Türkiyənin qırmızı xəttidir: “Sülh şəhəri kimi tanınan Qüdsün və bütün Fələstin torpaqlarının əvvəlki günlərinə qayıtmasını arzulayırıq”.

Zirvə toplantısında çıxış edən Səudiyyə Ərəbistanının vəliəhd şahzadəsi Məhəmməd bin Salman isə bəyan edib ki, Qəzza zolağında hərbi əməliyyatlar dərhal dayandırılmalı və blokada aradan götürülməlidir. 

Mürtəza
Ölkə.Az