FHN işçiləri ölkədə terror əsdirir
Kəmaləddin Heydərovun işçisi yol polisi əməkdaşını döydü
Gədəbəy Yanğından Mühafizə İdarəsinin rəisi polkovnik- leytenant Qalib Qarayev sərxoş halda avtomobili idarə edib, yol polisinin “saxla” əmrinə məhəl qoymayıb, onları təhqir edib və döyüb.
Daxil olan məlumata görə, olay bazar günü axşam saatlarında Gədəbəy rayonunun mərkəzində Heydər Əliyev parkının yaxınlığında baş verib.
Ölkədə Ramazan bayramını nə vaxt keçirmək müzakirələri getdiyi bir vaxtda Gədəbəy Yanğından Mühafizə İdarəsinin rəisi polkovnik-leytenant Qalib Qarayev öz bayramını təşkil edib. Qonaqları ilə yaxşıca yeyib-içdikdən sonra onları yola salmaq istəyən rəis əminlik üçün, sərxoş olsa belə özü qonaqların maşınının sükanı arxasına keçib.
Qalib Qarayevin təhlükəli sürüşü Yol Patrul Xidməti (YPX) əməkdaşlarının diqqətini cəlb edib. “Saxla” əmrinə məhəl qoymayan polkovnik-leytenant, bu əmrdən əsəbiləşib və maşını polisin üstünə sürüb. Bundan sonra YPX əməkdaşları sərxoş sürücünü təqib edib. Bu polkovnik-leytenantı bir az da əsəbiləşdirib və o maşını saxlayıb.
Maşının saxlandığını görən polis yaxınlaşanda qarşısındakının FHN-in Gədəbəy Yanğın Mühafizə idarəsinin rəisi olduğunu görüb. Bir qədər çaşğınlıq yaranıb. Belə ki, YPX əməkdaşı polkovnik-leytenantdan üzrxahlıq edib və tanımadığını bildirib. Lakın bu qəzəbli Qalib Qarayevin əsəblərini sakitləşdirməyib. O, əvvəlcə polis əməkdaşını söyüşlərə sonra isə şillə yumruğa “qonaq” edib. Maşında olan ikinci polisin yaxınlaşması və onu sakitləşdirmək istəyi polkovnik-leytenantı bir az da coşdurub və o, ikinci polisə də yumruq atıb.
Hadisə baş verən Heydər Əliyev parkında olan insanların müdaxiləsindən sonra Qarayev polislərdən əl çəkib.
Bundan sonra o, hadisə yerindən uzaqlaşıb, polislər isə onu təqib etməyi dayandırıb. Qabil Qarayev hadisədən xəbər tutan rayon polis idarəsinin çağırışına getməyib.
Səhərisi gün isə özünə gələn polkovnik-leytenant xoşagəlməz hadisədən sığortalanmaq istəyib. Necə deyərlər Qarayev “qara məni basınca, mən qaranı basım” prinsipini işə salıb. Polkovnik-leytenant DİN Yol Polisi İdarəsinə YPX əməkdaşları tərəfindən təhqir olunduğu və təzyiqlərə məruz qaldığı barədə şikayət edib. Amma bu dəfə o kələfi bir az da dolaşdırıb.
Məsələ ondadır ki, cənab polkovnik-leytenant nəzərə almayıb ki, baş verənlər bütünlüklə YPX maşınında yerləşdirilmiş kamera tərəfindən çəkilib. Necə deyərlər bu dəfə “ət yeyən quş dimdiyindən tora düşüb”.
Baş vermiş hadisə ilə bağlı həm daxili işlər naziri Ramil Usubov, həm də fövqəladə hallar naziri Kəmaləddin Heydərov məlumatlandırılıb.
Hər iki nazir baş vermiş hadisənin araşdırılması üçün xüsusi tapşırıqlar verib. Bununla bağlı bölgəyə xüsusi komissiya göndərilməsi qərara alınıb.
Bugünə qədər küçədə sürücüləri döymək məsələsində xüsusi reputasiyanı Nəqliyyat Nazirliyi əməkdaşları qazanmışdı. Təbii ki, bu mənfi hal cəmiyyətdə də birmənalı qınanır. Amma bu hal davam edir. Gözləmək olar ki, FHN əməkdaşının bu hərəkəti rəhbərlik tərəfindən düzgün qiymətləndiriləcək və cəmiyyətdə “nəqliyyat qoçuları” termini ilə yanaşı “FHN qoçuları” termini də yaranmayacaq.
Sözsüz ki, baş vermiş hadisə Fövqəladə Hallar Nazirliyinin reputasiyası üçün çox mənfi bir haldır. Məhz elə buna görə də ümid etmək olar ki, nazir Kəmaləddin Heydərov da FHN-in formalaşmış müsbət imicinə xələl gətirən bu halın obyektiv araşdırılması və qiymət verilməsini təmin edəcək.
Bölgəyə göndərilmiş xüsusi komissiyanın işinin yekunları ilə bağlı məlumat verəcəyik. (Bugun.az)
Ölkə.az
