Bərdədə 17 yaşlı oğlan qonşusunu öldürməkdə təqsirləndirilir

Bərdədə qonşusunu bıçaqlayaraq qətlə yetirməkdə təqsirləndirilən Zöhrab Əsgərovun cinayət işi üzrə məhkəmə araşdırması başlayıb.

"Ölkə.Az" xəbər verir ki, cinayət işinin materialları Gəncə Ağır Cinayətlər Məhkəməsində hakim Faiq Mahmudovun sədrliyi ilə araşdırılır.

İş üzrə məhkəmə hazırlıq iclası keçirilib və anket məlumatları dəqiqləşdirilib.

Məhkəmə baxış iclası noyabrın 27-nə təyin olunub.

Qeyd edək ki, iyulun 11-i Bərdə rayonunun Qarağacı kənd sakini 1967-ci il təvəllüdlü Sahib Bayramovun almış olduğu xəsarətlərdən müalicə aldığı xəstəxanada ölməsi barədə rayon prokurorluğuna məlumat daxil olub.

Aparılan istintaqla 2006-cı il təvəllüdlü Zöhrab Əsgərovun iyulun 9-da aralarında yaranmış mübahisə zamanı Sahib Bayramova bıçaqla xəsarətlər yetirməsi nəticəsində sonuncunun 2 gün sonra müalicə aldığı xəstəxanada ölməsinə əsaslı şübhələr müəyyən edilib.

Fakta dair Cinayət Məcəlləsinin 120.1-ci (qəsdən adam öldürmə) maddəsi ilə Bərdə rayon prokurorluğunda cinayət işinin istintaqı aparılıb

Zöhrab Əsgərov təqsirləndirilən şəxs qismində cəlb olunaraq barəsində həbs qətimkan tədbiri seçilib.