Cəlilabaddakı yanğının dəhşətli təfərrüatı: telefon zaryatkada olarkən partlayıb - YENİLƏNİB

Bu gün Cəlilabad rayonunun Buravar kəndində fərdi yaşayış evində iki nəfərin xəsarət alması ilə nəticələnən yanğın hadisəsinin səbəbi məlum olub

İqtisadiyyat.az yanğınla bağlı bəzi təfərrüatları əldə edib. 

Belə ki, araşdırmalarla məlum olub ki, yanğına fərdi yaşayış evində otaqlardan birində enerjiyə qoşulan telefonun anidən partlaması səbəb olub.

Enerjiyə qoşulu olan telefonun yükləyicisində (adapter) qısaqapanma yaranıb və bu zaman cihaz alışıb. Nəticədə yanğın otaqdakı parça əşyalara keçib. 

Həmin evdə yaşayan 1991-ci il təvəllüdlü Tacəddin Cəfərov və qardaşı, 1993-cü il təvəllüdlü Saməddin Cəfərov yanğını söndürməyə çalışarkən xəsarət alıblar.

Hər iki qardaş əl, üz, boyun və baş nahiyəsindən yanıq xəsarətləri diaqnozu ilə Cəlilabad Rayon Mərkəzi Xəstəxanasına yerləşdirilib.

Faktla bağlı araşdırmalar davam etdirilir.

***

Cəlilabad rayonunda evdə yanğın olub, iki nəfər xəsarət alıb.

"Report"un Muğan bürosunun məlumatına görə, hadisə rayonun Buravar kəndində qeydə alınıb. Belə ki, evdə baş verən yanğını söndürən zaman iki nəfər xəsarət alaraq, rayon xəstəxanasına aparılıb.

Hazırda onların şəxsiyyəti və hadisənin təfərrüatları dəqiqləşdirilir.

Faktla bağlı araşdırma aparılır.