“Region yeni savaşa sürüklənir, Əliyevin xəbərdarlığı qulaqardına vurulmamalıdır”
“Bu il noyabrın 15-də ABŞ Konqresində baş verənlər 1992-ci ildə "Azadlığı Müdafiə Aktı"na 907-ci düzəliş etməklə Azərbaycana dövlət səviyyəsində yardımı yasaqlayanların eyni siyasəti yenə də davam etdirdiklərini göstərir. Azərbaycan torpaqlarının müəyyən bir hissəsi işğal olunarkən Xocalı soyqırımı baş verərkən belə bir düzəlişin edilməsi təkcə Ermənistana dəstək deyildi, həm də Azərbaycan torpaqlarının işğalını, 20 Yanvar qətliamı kimi Xocalı soyqırımını da ABŞ-nin alqışladığı demək idi”.
Ölkə.Az xəbər verir ki, bunu deputat Sahib Alıyev parlamentdə çıxışı zamanı deyib.
Onun sözlərinə görə, yırtıcı dövlətlər heç zaman düzəlmirlər və öz xislətlərini dəyişən deyillər. “Ona görə də buradan onların geosiyasi alət kimi faydalandıqlarına Ermənistandakılara səslənmək istəyirəm. Azərbaycanla İraq Prezidentlərinin görüşlərinin yekunuyla bağlı dünənki birgə bəyanatda səsləndirilənlərdən də göründüyü kimi bizim region yeni savaşa sürüklənir ki, bununla bağlı cənab İlham Əliyevin xəbərdarlığını qulaqardına vurmamalıdırlar. Ermənistandakı toplum Azərbaycan liderinin xəbərdarlıqlarına, o sıradan mayın 28-də Laçında Qarabağdakı hərbi xunta və qanunsuz silahlı birləşmələrin ləğvi tələbinə məhəl qoyulmamasının nə ilə nəticələndiyini, iki ay öncə baş verənləri unutmamalı, yeni qarşıdurmaya gedəcəkləri halda nə Fransasının, nə də digərlərinin yenə də onlara kömək edəcəklərini anlamalıdır. Xatırladım ki, Paşinyandan öncəki varçapetləri Serj Sarqsyan özünə xas həyasızlıqla bizim torpaqları qan tökərək ələ keçirdiklərini bildirir və kinayə ilə deyirdi ki, bacarırsınıza buyurun geri qaytarın. O, hətta 44 günlük savaşdan sonra belə Qarabağın heç zaman Azərbaycanın tərkibində olmayacağından dəm vururdu. Düz bir ay sonra indi üçrənglimiz dalğalanan Xankəndi şəhərinin stadionunda bizim iki komandamız futbol yarışı keçirəcəklər. Bu sizə dərs olmadımı? Anlamaq bəyəm o qədərmi çətindir ki, indi Paşinyanı revanşizmə həvəsləndirənlər məhz Sarqsyanı arxayın salırdılar ki, Azərbaycanı öz torpaqlarını azad etməyə qoymayacaqlar. Qərbdəkilər - Fransası, dırnaqarası sülh fondlarından Ermənsitanın militarlaşdırılmasına vəsait ayırmağı planlaşdıran Avropa Birliyi, həmən Avropa Birliyinin get-gedə Fransalaşmasının heç də Makronun deyil, özlərinin xidməti olduğunu noyabrın 15-də Konqresdəki dinləmədə rəsmi təmsilçisi Ceyms Obraynın dilə ilə dedirtdirən ABŞ-si, regionumuzdakı iki böyük hay havadarı bizim önümüzü kəsə bildimi?”, - o qeyd edib.
Deputat Əlavə edib ki, cənab İlham Əliyevin Ermənistanın yeni savaş hazırlığı görməsi haqda dedikləri qarşı tərəfin və ondan geosiyasi alət kimi faydalananlarının bizimlə bağlı eyni iddialarından fərqli olaraq tam əsaslıdır: “Buradan soruşuram: əgər Ermənsitan yenidən Azərbaycanın torpaqlarını ələ keçirməyə hazırlaşmırsa, onda bizim ərazi bütövlüyümüzü dəqiq rəqəmlər gətirməklə tanıdığını deyən Nikol Paşinyanın rəsmi saytında nədən Artsax bölməsi qalır və orada özləri özlərini buraxanlar yenidən prezident, parlament və sair kimi göstərilir. Və nədən həmən ölkənin Xarici İşlər Nazirliyinin rəsmi saytında Qarabağ azmış kimi Naxçıvan da hay torpağı kimi təqdim edilir?
Maraqlıdır, ABŞ başda olmaqla qərbdəki çevrələr əgər doğrudan da bizim regionda sülh istəyirlərsə, niyə Ermənistanı başqasının torpağına göz dikməyə son qoymağa çağırmaq əvəzinə onu silahlandırırlar. Qoy silahlandırsınlar, amma mən keçmişin təcrübəsindən də çıxış edərək əminliklə bildirirəm ki, Azərbaycan bu regionda sülhü təmin edəcək və o sülh qərbdəkilərin bizə sırımağa çalışdıqları yox, Prezidentimizin də vurğuladığı kimi tarixi ədalətə əsaslanan sülh olacaq”.
Mürtəza
Ölkə.Az
