Komitə sədri ilə deputat arasında gərginlik: Savadsızlıq və qərəzlilikdir
Milli Məclisdə 2024-cü il büdcə zərfində sosial sektora aid büdcə zərfinin müzakirəsi zamanı çıxış edən deputat Vahid Əhmədov və Etibar Əliyevin çıxışı parlamentin Əmək və sosial siyasət komitəsinin sədri Musa Quliyev tərəfindən kəskin etiraza səbbə oldu.
Ölkə.Az xəbər verir ki, deputat Etibar Əliyev median pensiya ilə bağlı məsələnin sənədlərdə əksini tapmaması, deputat Vahid Əhmədovun isə sosial müavinətlər, işsizliklə bağlı iradları komitə sədri tərəfindən kəskin reaksiyaya səbəb oldu.
“Burada çıxış edən deputatların çıxışları ikinci oxunuşun deyil, birinci oxunuşun tələblərinə cavab verirdi. Etibar Əliyevin median pensiya məsələsi ilə bağlı qaldırdığı məsələyə gəldikdə burada hər hansısa gizlilik yoxdur. Bu yazını Sizin üçün kim yazıb deyə bilmərəm, amma elə deyil”, - komitə sədri qeyd edib.
Deputat Etibar Əliyev isə komitə sədrinin bu reaksiyasına sərt cavab verərək bildirdi ki, bu savadsızlıq və qərəzlilikdir.
“Deputatın məsləhətçisi ola bilər, bu, yaxşı haldır. Amma çıxışlarımı özüm yazıram. Tənqidi firkimi bildirmişəm. Əgər arqumentiniz varsa, deyin. Məsləhətçim kimdirsə, yazıbsa, özüm bilərəm”, - deputat bildirib.
Musa Quliyev məsələyə müdaxilə edərək bildirdi ki, onun dedikləri etikaya zidd deyil: “Etibar Əliyev dostumuzdur və ona hörmətimiz var. Əgər Etibar özü bizi dostluqdan çıxararsa, özü bilər”.
Spiker Sahibə Qafarova da deputatlaırn bu çıxışına öz iradını bildirdi. O deputatları etik qaydalara riayət etməyə çağırdı. “Etibar müəllim dostluqdan çıxarmaz, istəsə belə buna imkan vermərik”, - spiker qeyd edib.
Mürtəza
Ölkə.Az
