“Dərnəgül” bazarına dəymiş ziyan necə qarşılanacaq? - AÇIQLAMA
Bakıda “Dərnəgül” taxta bazarı kimi tanınan inşaat materialları bazarında güclü yanğın baş verib. Yanğın sahəsinin təxminən 4 min kvadratmetrə çatdığı bildirilir.
Ticarət mərkəzinə və burada satışa çıxarılan inşaat mallarına dəymiş zərərin necə qarşılanacağı isə sual doğurur.
Sığorta sahəsi üzrə ekspert İlkin İbrahimov “Ölkə.Az”a açıqlamasında bildirdi ki, daşınmaz əmlakla bağlı ölkəmizdə bir neçə sığorta məhsulu mövcuddur:
“Bunlar daşınmaz əmlakın icbari sığortası və daşınmaz əmlakın istismarı ilə bağlı mükli məsuliyyətin icbari sığortasıdır. Bir də daşınar əmlakın könüllü sığortası mövcuddur ki, burada satış məqsədilə gətirilən malların sığortalanması nəzərdə tutulur.
Ekspertin sözlərinə görə, ticarət obyektlərinin sığortalanması üçün Fövqəladə Hallar Nazirliyi (FHN) tərəfindən verilmiş yanğın təhlükəsizliyi aktına ehtiyac var:
“Əvvəlki təcrübələr göstərir ki, belə yerlərdə adətən sənədlər qaydasında olmur. FHN bu yerlər üçün yanğın təhlükəsizliyi qaydaları ilə bağlı akt müəyyən etməlidir. Güman olunur ki, burada belə akt yoxdur. Akt olmadıqda isə sığorta şirkətləri belə yerlərdə sığortalanmanı həyata keçirmir. Çünki ilk növbədə həmin yerlərin sənədi və FHN-in aktı olmalıdır. Ticarət mərkəzlərində baş vermiş əvvəlki yanğınlardan da görüdüyümüz kimi, FHN bu obyektlərə yanğın təhlükəsizliyi aktı verməyib. Bu akt olmadıqda nə daşınar, nə də daşınmaz əmlak sığortalana bilir”.
Ticarət obyektindəki inşaat materiallarının, yəni daşınar əmlakın sığortasına və dəymiş zərərin qarşılanmasına gəlincə isə İ.İbrahimov deyir ki, bu mallar da uçota alınmalıdır:
“Daşınar əmlakların sığortalanması üçün onların qanuniləşməsinə və vergiyə cəlb olunmasına ehtiyac var. Mədaxil və satış rəqəmləri görünmədiyi halda daşınar əmlak sığortalana bilmir. Belə olan halda isə bu cür yanğın hadisələrində dəymiş zərər qarşılanmır. Ümumilikdə, sözügedən sənədlər varsa və slğortalanma həyata keçirilibsə, zərər qarşılana bilər”.
Könül
Ölkə.Az
