\"Ana, atamın maşını nə vaxt gələcək?\"
Cəbhənin Ağdam istiqamətində sentyabrın 26-da Ermənistan ordusunun atəşkəsi pozması nəticəsində mülki səxs, əslən Ağdamın işğal altındakı Muğanlı kənd sakini 1976-cı il təvəllüdlü Bəhram Bağırov həlak olub. Mərhum Ağdamın Baharlı qəsəbəsində yaşayırdı...
Hadisə baş verən gün mən - Ölkə.Az-ın əməkdaşı Baharlı qəsəbəsində idim.
Axşam saatlarında qaldığımız evin qonşuluğunda qışqırtı səsi gəldi və istər-istəməz səs gələn səmtə getdik. Məlum oldu ki, düşmənin 82 millimetrlik minaatanlardan açdığı atəş söhbət edən dörd sakinin yanına düşür. Bu zaman Bəhram Bağırov aldığı ağır yaralardan yerindəcə həlak olur, başqa bir sakin isə qəlpə yaraları alır.
Mərhumun cəsədini evə hərbçilər gətirdilər. Ağlaşma, qışqırıq səsləri gecənin məsum səssizliyini pozdu. Bir hərbçi isə mərhumun yaxınlarına ürək-dirək verərək, "Ana, narahat olmayın, öz əllərimlə yumuşam, mərhumu yumaq lazım deyil. Halal xoşu olsun, dəfn edərsiniz..."
Mərhumun dəfnindən bir gün sonra böyük qardaşı, Bağırov Eldəniz Ölkə.Az-a danışır: "Hadisədən 20:30 radələrində xəbər tutduq. Ermənilər minamiyotdan atəş açıb. Minamiyot 4 nəfərin yanına düşüb. Qardaşım Bəhram rəhmətə gedib. Bir nəfər də yaralanıb. Qardaşımın iki körpə uşağı qalıb. Uşaqlardan biri bu il birinci sinifə gedir, o birisi isə hələ körpədir. Dəfn mərasiminə icra başçısı, digər nümayəndələr və hərbçilər gəlir. Gəlməkdə də davam edirlər. Diqqət var, ancaq qardaşım yoxdur..."
Sözün bitdiyi an...
Söhbət əsnasında mərhum Bəhramın balaca qızı gəlib deyir, ana, atamın maşını nə vaxt gələcək? Atam gəlib bizi aparsın babamın qəbrinin üstünə...
Babası üçün darıxan, babasının qəbrinin üstünə atası ilə getmək istəyən balaca bilmir ki, bundan sonra atası üçün qəbirstanlığa gedəcək, onu görmək üçün başdaşına baxmaqla kifayətlənəcək....
Mərhumun həyat yoldaşı Bağırova Göyçək Ölkə.Az-a bildirir ki, hadisə Əfətli kəndi tərəfdə olub.
"Hadisəni axşam bilmişik. Həmin gün özünə dəfələrlə zəng etdik, telefona cavab vermədi. Hadisə yerində olanlardan bir nəfər qaynıma zəng edib deyib ki, qardaşın şəhid oldu. Rayon rəhbərliyi gəlir, hər kəs diqqət ayırır, ancaq özü olmayandan sonra nəyə yarar?", deyə Bəhramın həyat yoldaşı ağlayaraq bildirir.
Cəbhə bölgəsində olarkən hər axşam atəşkəsin dəfələrlə pozulduğunun şahidi oluruq. Ermənilər artıq iriçaplı silahlardan, səngərləri yox, yaşayış məntəqələrini, əsgərlərimizin yatdığı kazarmaları nişan alır. Əhali isə bu vəziyyətdən cana yığılıb, problemin kökündən həll olmasını istəyir. Dindirdiyimiz hər kəs "müharibə, döyüş və qələbə!" deyir. Həqiqətən də cəbhə bölgəsində olarkən bunu özün də dərk edirsən ki, bu vəziyyətin bir sonu olmalıdır. Qan beyninə vurur və bir anlıq içindən təkbaşına özünü düşmənin üzərinə atmaq, öldürmək və ölmək istəyirsən...
Səxavət Məmməd
Ölkə.Az
