Sədr Eyvazov həbsdən buraxıldı: ev dustağı olacaq

Azərbaycanda həbs edilmiş bələdiyyə sədri ilə bağlı məhkəmə qərar verib.

Ölkə.Az-ın əldə etdiyi məlumata görə, məhkəmənin qərarı ilə Şəki rayon Qoxmuq bələdiyyəsinin sədri Etibar Eyvazov ötən gün ev dustaqlığına buraxılıb. 

Xatırladaq ki, E.Eyvazovun 2020-2022-ci illər ərzində Torpaqların dövlət idarəetməsinin təşkili və geodeziya şöbəsinin sektor müdiri İldırım Məmmədov və digər təqsirləndirilən şəxslərlə qabaqcadan əlbir olaraq xidməti vəzifələrinin icrası ilə əlaqədar bələdiyyə mülkiyyətində olan torpaq sahələrinin mülkiyyətə, istifadəyə və icarəyə verilməsinə dair müsbət rəyin verilməsinə görə ayrı-ayrı şəxslərdən müxtəlif məbləğlərdə pul vəsaitlərini rüşvət qismində almalarına əsaslı şübhələr müəyyən edilmişdi.

Qeyd edilən faktlarla bağlı ötən ilin aprelində Şəki rayonun Qoxmuq kənd bələdiyyəsinin sədri Etibar Eyvazov da daxil olmaqla ümumilikdə 19 vəzifəli şəxsə Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.1, 311.3.2, 311.3.3 (qabaqcadan əlbir olan bir qrup şəxs tərəfindən təkrarən külli miqdarda rüşvət alma), 312-1 (vəzifəli şəxsin qərarına qanunsuz təsir göstərmə (nüfuz alveri) və digər maddələri ilə ittiham elan edilərək barələrində həbs, ev dustaqlığı, vəzifədən kənarlaşdırma və polisin nəzarəti altına vermə qətimkan tədbirləri seçilməklə cinayət işi baxılması üçün Bakı Ağır Cinayətlər Məhkəməsinə göndərilmişdi.

Ölkə.Az