Gürcüstan müsəlmanlarına yeni şeyx seçildi: o kimdir? - DOSYE

Bu gün Gürcüstan Müsəlmanlar İdarəsinin Ali Şurası yeni şeyx seçib.

Ölkə.Az xəbər verir ki, namizədlər “Alul Beyt” təşkilatının rəhbəri Hacı Faiq Nəbiyev, Marneuli Qızılhacılı İmam Həsən məscidinin axundu Hacı Qurban Murquzov və Muslimmedia-nın rəhbəri Hacı Vidadi Qurbanov olub.

Üç namizədin iştirak etdiyi səsvermədə Hacı Faiq Nəbiyev şeyx seçilib.

Gürcüstanın yeni Şeyxi Hacı Faiq Nəbiyev kimdir?

Faiq Teymur oğlu Nəbiyev 11.04.1977-ci ildə Gürcüstanın Marneuli şəhərində anadan olub.

Təhsilini Marneulinin 4 saylı məktəbində rus dilində başlayıb, elə bu məktəbdən 1994-cü ildə məzun olub.

Azərbaycanın Gəncə şəhərində, “Gəncə Mədrəsəsi”ndə, həmçinin Beynəlxalq Əl-Mustafa Universitetində 5 il müddətində təhsil alıb.

2001-ci ildə “Alul Beyt” Dini Mədəni Maarif Mərkəzi təsis olunduqdan sonra bu günə kimi mərkəzdə müdir vəzifəsində çalışıb.

Bütöv Gürcüstan Müsəlmanları İdarəsinin Ali və Elmi Şurasının üzvüdür. 

Ərəb, fars, rus dillərini bilir. 

Evlidir, üç övladı var.

Qeyd edək ki, Faiq Nəbiyev Marneulinin Baş Axundu Hacı Əziz Nəbiyevin qardaşıdır.