AXC-nin elan edildiyi binanın təmiri üçün tender elan edilib
Tbilisi İnkişaf Fondu Milli Gənclər və Uşaqlar Sarayının təmir və bərpası məqsədilə növbəti dəfə tender elan edib.
APA-nın Tbilisi müxbiri “Commersant.ge” nəşrinə istinadən xəbər verir ki, paytaxtın Rustaveli prospektində yerləşən tarixi binanın bərpasının üçüncü mərhələsində görüləcək işlərə təxminən 15 milyon lari ayrılması nəzərdə tutulub. Təkliflərin dekabrın 21-dən 26-dək qəbul ediləcəyi, işlərin maksimum 12 ay ərzində görülməli olduğu vurğulanıb.
Qeyd edək ki, Azərbaycan Xalq Cümhuriyyətinin öz müstəqilliyini 1918-ci ildə məhz həmin binada elan etdiyi bildirilir. Tarixi 1802-ci ilədək gedən tarixi bina 1917-ci ilədək çarın Qafqaz canişininin sarayı kimi istifadə edilib və daha əvvəl Vorontsov sarayı, Pioner sarayı kimi adlarla tanınıb.